Цæгат Ирыстоны медицинон кусджыты профессионалон æмвæзад фæуæлдæр кæнынæн æппæт уавæртæ дæр саразын. Уый уыди проектон офисы æмбырды сæйраг хъуыды. Амыдта йæ республикæйы сæргълæууæг Битарты Вячеслав. Программæ «Медицина»-йы фæлгæты регионы дохтыртæ ацæудзысты ахуыртæ æмæ стажировкæ Уæрæсейы хуыздæр медицинон центрты.
1 мартъийы анестезиологты фыццаг къорд рацæудзæн ахуыртæм Цæгат Кавказы бирæвæрсыг медицинон центрмæ. Кандидатты æвзары сæрмагонд къамис. Ныридæгæн уал равзæрстой 14 дохтыры. Æдæппæтæй проект «Развитие службы анестезиологии и реаниматологии в Северной Осетии»-йы фæлгæты сæ дæсныйад фæуæлдæр кæндзысты 18 специалисты.
Беслæны бирæвæрсыг центры ахуыртæ чи ацæуа, уыдонæй 8 адæймаджы арвитдзысты Мæскуымæ. Уæрæсейы профессионалон ахуырады медицинон академийы сæ бон уыдзæн анестезиологи æмæ реаниматологийы къабазы сæ зонындзинæдтæ фæхъæздыгдæр кæнын. Ахуыртæ уыдзысты бюджетон бындурыл. Уыимæ ма, ахуырты рæстæг специалисттæ исдзысты сæ мызд дæр. Гæнæн ис, æмæ проекты иннæ къæпхæны медиктæн саразой фæсарæнты стажировкæтæ æмæ ахуыртæ. Битарты Вячеслав куыд фæнысан кодта, афтæмæй специалисттæн хъуамæ, æнæмæнг, уа фадат сæ фæлтæрддзинад фылдæр кæнынæн. Афтæмæй дунейы раззагдæр æмæ ногдæр технологитæй спайда кæнæн уыдзæн республикæйы дæр. Бахæс ма кодта цыбыр рæстæгмæ 10 дохтырæй кусæг къорд сæмбырд кæнын.
Ныхас ма цыд проект «Цæгат Ирыстоны хуыздæр дохтыр»-ыл. Номинациты уæлахиздзаутæ бацархайдзысты æппæтуæрæсеон æркасты. Раздæр нæ регионы медицинон кусджытæ федералон конкурсы нæ архайдтой. Уæлахиздзаутæн ма бафтдзæн сæ мыздыл дæр.
Компани «Медфармконсалтинг и экспертиза» кусы пайдайаг кæрдæджытимæ. Спайда кæнæн сæ ис фармацевтон, косметикон æмæ медицинон къабæзты. Проектыл ныхас цыд раздæры æмбырдты. Гранты фæрæзты 250 мин сомæй бантыст балхæнын хъæугæ кусæнгæрзтæ. Ныртæккæ компани архайы кондад фæуæрæхдæр кæныныл. Хъуамæ сын рахай кæной Мызуры бынат, стæй Црауы зæхх. Афтæмæй фæзындзæн ног кусæн бынæттæ дæр хъæуты. Битарты Вячеслав бабар кодта районы хицауад æмæ профилон ведомствæтæн æмбæлгæ æххуыс бакæнын компанийæн, цæмæй сæ куыст ма фæкъуылымпы уа.
Хуасдзауты Алинæ
