Республикæйы объектты газы ифтонгад банывыл кæныны тыххæй Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло дзырдта «Газпром межрегионгаз»-ы генералон директор Сергей Густовимæ. Фембæлд уыдис Санкт-Петербурджы æппæтдунеон экономикон форумы.
Æмбырды архайджытæ æрдзырдтой æмгуыстады фарстатыл. Сергей Меняйло куыд фæнысан кодта, афтæмæй газы хæтæлтæ сты заууат уавæры. Ныртæккæ сæ 68% нал бæззынц. Сергей Густов куыд радзырдта, афтæмæй компани «Газпром межрегионгаз» цæттæ у республикæимæ æмгуыстдзинадмæ. Уæлдайдæр, Цæгат Ирыстон æрдзон газæй артаг æмæ артаджы станцæтæ аразынмæ цæттæ кæй у, уый фехъусгæйæ. Ахæм хъуыдыйыл хæст у республикæйы хицауад.
Æрдзон газы бындурыл артагæй нæм пайда кæнын райдаиккой суанг æхсæнадон транспорты къабазы дæр. Ныридæгæн уал ахæм станцæтæ Цæгат Ирыстоны ис дыууæ: Дзæуджыхъæу æмæ Мæздæджы. Сергей Меняйло ма бæрнон адæмимæ ныхас кодта Мамысоны райрæзтыл дæр. Бæлвырд куыд у, афтæмæй рæхджы компанитæ «Курорты Северного Кавказа» æмæ «Корпорация развития Северного Кавказа», зæгъгæ, баиу уыдзысты. Ног иугонд хæрзмæ сахаддзæн Цæгат Кавказы регионты инвестицион гæнæнтыл æмæ проектты райрæзтыл.
