Дунейы амалхъом адæм, политиктæ æмæ эксперттæ 70 бæстæйæ – иууылдæр æрымбырд сты Санкт-Петербургы. Уым цæуы æппæтадæмон экономикон форум. Ахсджиаг мадзалы архайы цæгатирыстойнаг делегаци дæр. Йæ сæргъы республикæйы сæргълæууæджы хæстæ рæстæгмæ æххæстгæнæг Сергей Меняйло. Кусæг балцы тыххæй нæ дарддæры æрмæг.
Æмгуыстады фыццаг бадзырд бафыстам Новосибирскы облæстимæ. Документы бын сæ къух æрæвæрдтой Сергей Меняйло æмæ Новосибирскы облæсты губернатор Андрей Травников. Дыууæ регионы æнгом æмархайд ног уæрæх фадæттæ дæтты ахуырады къабазы рæзтæн. Уæвгæ, канд уымæн нæ.
Андрей Травников куыд фæнысан кодта, афтæмæй дыууæ субъектæн ис хъæбатырдзинадимæ баст иумæйаг истори. Новосибирскы облæстæй рацæуæг Петр Барбашов, 1942 азы Дзæуджыхъæу фашисттæй хъахъхъæнгæйæ, йæ ном сæнусон кодта. Сыбираг лæппу, Советон Цæдисы хъæбатыр йæ лæгдзинад кæм равдыста, уым фæзынд мемориалон комплекс Барбашовы фæз.
Петербургы æппæтадæмон экономикон форум у Уæрæсейы сæйраг экономикон мадзал. Арæзт цæуы 1997-æй азæй, 2006 -æм азæй фстæмæ та президент Владимир Путины архайдимæ. Ацы аз мадзал цæуы равдыстыты центр «Экспофорум» -ы. Йæ сæйраг темæ «Снова вместе. Экономика новой реальности» зæгъгæ сæргонд.
Петербургы форумы Сергей Меняйлойæн уыдзæн цалдæр куыстадон фембæлды. Уымæй уæлдай республикæйы разамонæг бацархайдзæн Инвестицион уавæрыл дзурæг Национ рейтинджы презентацийы. Сбæрæг дзы уыдзæн, Цæгат Ирыстон уыцы рейтинджы цы бынат ахсы, уый. «Экономикæ æмæ финансты» фарстаты фæдыл Уæрæсейы паддзахадон Советы къамисы æмбырды дæр Сергей Меняйло бацархайынвæнд кæны.