Санкциты рæстæг экономикæ фæцудын ма ‘руадзын. Уый тыххæй цавæр архайд цæуы æмæ республикæйы социалон экономикон райрæзт цы уавæры ис, ууыл æрдзырдтой оперативон штабы æмбырды. Амыдтой йæ регионы разамонæг Сергей Меняйло æмæ премьер Дзанайты Барис.
Сæргълæууæг бабар кодта, цæмæй паддзахадон программæтæ æмæ национ проекттæм гæсгæ цы мадзæлттæ цæуынц, уыдонмæ бæстон цæстдард уа. Регионы цалцæг кæнынц æмæ аразынц социалон инфраструктурæйы объекттæ. Ацы аз нын фадат ис афойнадыл контракттæ бафыссын, нæ нысантæ сæххæст кæнынхъом чи у, уыцы куыстуæттимæ, – загъта Сергей Меняйло.
Экономикон райрæзты министр Кучиты Зауыр фæбæрæг кодта, фарон республикæйы макроэкономикон бæрæггæнæнтæ кæй фæхуыздæр сты, уый. Дзанайты Барис бабар кодта экономикон уавæрмæ æппынæдзух кæсын, зонын ног гæнæнтæ æмæ тæссаг æууæлтæ дæр. Экономикон райрæзты министрад Хъæууон хæдзарады министрадимæ иумæ хъуамæ бынæттон кондады минæвæрттæм сæ продукци уæй кæнынмæ фæкæсой.
Арæзтад æмæ архитектурæйы министр Моргуаты Константин куыд загъта, афтæмæй бæрзонд инфляцийы æмæ санкциты аххосæй фарон арæзтадон æрмæг фæзынаргъ. Уый фæдыл цæрæнуæттæ эксплуатацийы дæттыны хъуыддаг дæр фæсындæг уыдзæн. Фæлæ Цæгат Ирыстоны нысангонд пълан æххæстгонд æрцыд уæлдайджынтæй. Цæрæнуæтты 323 мин квадратон метры бæсты радтой 340 мин квадратон метры. Арæзтады къабазмæ æнхъæлмæ кæсынц ногдзинæдтæ. Нымæцон инструменттæй пайда кæндзысты зынгæ фылдæр.
Премьер радон хатт зæрдыл æрлæууын кодта, национ проекттæ æмæ паддзахадон программæтæм гæсгæ цалцæг æмæ арæзтадмæ æппынæдзух цæстдард кæй хъæуы.
