Сбæрæг сты Хъамбердиаты Мысосты номыл премийы лауреаттæ. Номинаци «Поэзия»-йы уæлахиздзау сси Гуыбыраты Зæлинæ. Конкурсы архайдта йе ‘мдзæвгæты ‘мбырдгонд «Время не вернуть», зæгъгæ. Номанаци «Драматургия»-йы та хуыздæрыл банымадтой Дарчиты Хетæджы пьесæ «Адæймаг», у ирон æвзагыл фыст.
Премийы лауреатты сбæрæг кодтой республикон къамисы ‘мбырд. Амыдта йæ Цæгат Ирыстоны хицауады сæрдары хæдивæджы хæстæ рæстæгмæ æххæстгæнæг Тугъанты Ларисæ. Ацы аз преми райсынмæ курдиæттæ балæвæрдтой 10 адæймаджы.
Сæ уацмыстæ фыст сты куыд ирон ирон, афтæ уырыссаг æвзагыл дæр. Уыдонæй 4 куысты сты номинаци «Поэзия», 3 куысты сты «Проза»-йы æмæ ма 3 куысты та «Драматургия»-йы. Алы номинацийы дæр сбæрæг уыдзæн 1 уæлахиздзау. Республикæйы фысджыты Цæдисы сæрдар Агънаты Гæстæн куыд загъта, афтæмæй, хъыгагæн, ирон æвзагыл фыст дзы уыд æрмæст дыууæ куысты. Фарстайыл хъæуы архайын, цæмæй уавæр аива.