Цæгат Ирыстоны хъармгæнæн сезон фæуыдзæн 1 майы. Уый тыххæй аппаратон æмбырды фехъусын кодта цæрæнуатон-коммуналон хæдзарад, артаг æмæ энергетикæйы министр Хъараты Тимур. Бæстонæй цæттæ кæнынц сæрдыгон сезонмæ. Доны куыстуат дарддæр архайы донцъирæнтыл. Алханчурты бацæттæ кодтой дыууæ, цыппар та ма сног кæндзысты Тарскæ, Комгæрон æмæ Елхоты.
Сергей Меняйлойы амындзинадмæ гæсгæ Æрдзон æвæрæнтæм цæстдарды Федералон службæ полигоны фыццаг картæ бахаста паддзахадон реестрмæ. 25-æм маймæ республикæ райсдзæн лицензи быронæвзарæн заводæн. Ныхас кодтой эпидемиологон уавæрыл дæр. Республикæйы у сабыр. Карантины ‘хгæд скъолатæ æмæ рæвдауæндæттæ нæй. Райсом кæронмæ æрхæццæ уыдзæн сывæллæтты чемпионат “Мастерята Алании”-йы регионалон къæпхæн, 200 æнахъомæй фылдæр уæлахиздзаутæ систы 15 компетенцийы. Æдæппæтæй дзы архайдтой 1700 ахуырдзауы.
Чемпионат регионалон æмвæзадмæ ракæнын у Сергей Меняйлойы уынаффæ. Æфсæддон-патриотон хъомылады 17 уынаффæгæнæджы – сæрмагонд æфсæддон операцийы архайджытæй ахуыртæ цæуынц Мæскуыйы рухстауынады паддзахадон университеты профессионалон цæттæдзинады программæйы фæлгæты. 30-æм апрелы уыдзæн паддзахадон аттестаци. Дзырдтой ма Уæлахизы бонмæ цæттæ кæныныл. Мадзæлтты сæйрагдæр уыдзæн æдасдзинады домæнтæ æххæст кæнын. Сергей Меняйло муниципалитетты разамонджыты æргом раздæхта мемориалты æмæ æфсымæрон ингæнты уавæрмæ. “Сæ цæсгæмттæм сын бакæс” акцийы фæлгæты ныридæгæн бакуыстой 1073 курдитыл. Дзæуджыхъæуы мэр Милдзыхты Вячеслав куыд фехъусын кодта, афтæмæй спайда кодтой рекламæйы фæрæзты 40%-æй. 5 маймæ ветеранты къамтæ хъуамæ фæзыной æппæт сденттыл дæр.
