Социалон æгъдауæй тæссаг уавæры чи ис, 363 ахæм бинонтæ ис Цæгат Ирыстоны хыгъды. Комплексон реабилитацийы программæйы фæлгæты сын кæнынц материалон æмæ гуманитарон æххуыс. Фарстайыл æрдзырдтой æнахъом сывæллæтты хъуыддæгты фæдыл къамисы радон æмбырды. Сæрдариуæг дзы кодта вице-премьер Азымты Иринæ.
Дыгуры, Мæздæджы, Рахизфарсы æмæ Горæтгæрон районты сæ куыст аразынц «Æхсæнадон патрультæ». Æвæгæсæг æмæ, барад чи халы, уыцы æнахъом сывæллæттæм сæ цæст дарынц профилон органты минæвæрттæ. Къордгай зилынц æхсæвыгон уынгты, кæсынц æхсæнадон бынæттæм.
Фæсивæдон хъуыддæгты фæдыл комитет йæхи ’рдыгæй æппынæдзух аразы интернеты мониторинг. Фарон æнæзакъон контенты рабæрæг кодтой 70 цауæй фылдæр æмæ сæ арвыстой республикæйы прокуратурæмæ.