Суададжы скъола цалцӕг кӕнын райдыдтой мартъийы. Сӕйраг куыстытӕ аразджытӕ фесты. Къултӕ байсæрстой, уӕлхӕдзар раивтой, ног рудзгуытӕ ӕмӕ дуӕрттӕ сæвæрдтой. Ныртӕккӕ ма хъæуы агъуыстытæ саив кæнын. Къултӕ цӕттӕ кӕнынц ахорынмæ, кълӕсты ног цар аразынц ӕмӕ линолеум ӕвӕрынц. Ӕмгъуыды фарстайы къуылымпыдзинæдтæ нӕй, объект афоныл ратдзысты.
“Зындзинæдтæ ‘ййæфтам æрмæг ласыны хъуыддаджы. Уымæй уæлдай, сывæллæтты рæвдауæндоны хæрæндон скъолайы фарсмæ ис. Æмæ уый кусгæ кодта. Æмæ нæ æрмæст июлы райдианы бауагътой фыццаг уæладзыгмæ бавналын. Уый дæр сахадыдта куыстыты цыдыл”.
Алы бон дӕр ам кусы 20 адӕймаджы бӕрц. Специалисттӕ куыд зӕгъынц, афтӕмӕй скъола рагæй уыд зæронд ӕмӕ ӕвадат. Цалцӕджы фӕстӕ уыдзӕн хӕрзвадат ӕмӕ ӕдас. Фыццаг бӕрӕггӕнӕнтӕ зынынц дыккаг ӕмӕ ӕртыккаг уӕладзгуыты. Ныридӕгӕн уым плиткӕ сӕвӕрдтой ӕмӕ къултӕ ахорынмӕ бацӕттӕ кодтой. Ныртӕккӕ ма царӕн бындур аразынц. Цалцæджы фӕстӕ скъола фӕуӕрӕхдӕр уыдзӕн. Аразджытӕ баиу кодтой корпустӕ.
“Сæйраг корпус æртæуæладзыгон у. Йæ фарсмæ — иууæладзыгон. Уым бирæ рæстæг ницы уыд. Афтид уыди. Мах æй сцалцæг кодтам æмæ уый фæрцы скъолайы фæзынд актон зал æмæ фæуæрæхдæр хæрæндон”.
Скъолайы цалцӕг цӕуы федералон программӕ “Хуыздӕр уавæртæ — сывӕллӕттӕн”-мӕ гӕсгӕ. Ахуыры азы райдианы ардæм ӕрбацӕудзысты 350 сывӕллоны бæрц. Фендзысты райдзаст кълӕстӕ, ног дзаума ӕмӕ техникӕ. Хорз уавӕртӕ — ног ӕнтыстӕн бындур.
