Тагъд рæстæджы коронавирусы низы ныхмæ фæзындзæн хос. Вакцинæ хъуамæ регистрацигонд æрцæуа августы. Уадзын та йæ райдайдзысты сентябры. Уый тыххæй Уæрæсейы Федерацийы хицауады æмбырды фехъусын кодта вице-премьер Татьяна Голикова.
Эпидемиологийы æмæ микробиологийы национ иртæстыты центры специалисттæ хосыл куыстой къорд рæстæджы дæргъы. Ацы вакцинæ дохтыртæ райдыдтой фæлварын сæхиуыл майы. Ныр та цæуынц клиникон иртæстытæ Уæрæсейы æдасдзинад хъахъхъæнынады министрадимæ æмгуыст кæнгæйæ. Ахæм хуызы куыст ма кæнынц Уæрæсейы æмæ Санкт-Петербургы хуыздæр вирусологийы центрты дæр. Клиникон иртæстытæ кæронмæ куы æрхæццæ уой, уæд хъуамæ хос райдайой уадзын. Æппæтадæмон инновацион биотехнологон куыстуаты разамонæг Дмитрий Морозовы ныхæстæм гæсгæ, афæдзмæ кæндзысты 5 милуаны вакцинæйы.