Толдзгуны абон йæ дуæрттæ байгом кодта цалцæггонд культурæйы хæдзар. 30 азæй фылдæр бæстыхаймæ бындуронæй зылд нæ уыд. Ныр хъæуы сфæлдыстадон къордтæн фæзынд уавæртæ сæ арæхстдзинад хуыздæр кæнынæн. Райдзаст актон зал æмæ кабинеттæ. Банывыл кодтой культурæйы хæдзары цурмæ фæндаг дæр. Хъæуы цæрджытæн рауад æцæг бæрæгбон. Культурæйы артдзæст федта нæ уацхæссæг Хуасдзауты Алинæ дæр. Бæлвырддæр радзурдзæн йæхæдæг.
Райдзаст цалцæггонд актовый зали сценæбæл ачи бон райгъустæй Малити Геуæргий фæдзæхст. Нур рохсмæ æма культурæмæ тундзунмæ сувæллæнттæн ма сæ хестæртæн дæр уавæртæ фæззиндтæй. Æхсизгон хабари фæдбæл культури хæдзари саразтонцæ концертон программæ.
Зарæггæнгути къорд, кафгутæ, адæмон инструментти ансамбль, драмон къорд. Сæ арæхстдзийнадæ сфæлдистадон къордтæ уæлдæр кæндзæнцæ аци сценæбæл. Толдзгуни культури хæдзарæ 1985 анзæй нурмæ бæстонæй цалцæггонд некæд адтæй. Сувæллæнттæ æмæ хестæртæ архайдтонцæ гъæуи скъолай актовый зали. Нур, али къордæн дæр фадат уодзæй хецæн къабинетти косун. Уобæл цинæ кæнунцæ, куд сувæллæнтæ, уотæ хестæртæ дæр.
Культури хæдзарæ бацалцæг кæнун бантæстæй национ проект «Культурæ»-й фæрци. Косун ибæл райдæдтонцæ аци анз апрели. Баййифтонцæ бæстихайæн æ сæр, къæрæзгитæ, дуæрттæ. Сарæзтонцæ, йе ’нæнездзийнадæ гъигæдард кæмæн æй, уоци сувæллæнттæн уавæртæ. Дуккаг уæладзуги искодтонцæ киунугæдонæ. Ес си али кари адæмæн дæр литературæ. Æхсизгон гъуддаги фæдбæл гъæуи цæргутæн арфæ ракодта республики хецауади сæрдар Тускъати Таймураз.
Цалцæггонд культури артдзæсти архайдзæнцæ сувæллæнттæ дæр æма хестæр кари адæм дæр. Нур, æмбæлгæ уавæртæ син ку фæззиндтæй, уæд ма фæндæ кæнунцæ хестæртæн драмон къорд саразун дæр. Сувæллæнтти къорд сæхе хуарз равдесунцæ республикон конкурсти дæр.
Культури хæдзарæмæ бацæуæн над дæр исцалцæг кодтонцæ. Нур ма хæдзарæ цох æййафуй музыкалон инструменттæй. Хæстæгдæр рæстæг, Тускъати Таймураз куд загъта, уотемæй фарстабæл куст æрцæудзæнæй. Нæуæг уавæрти сфæлдистадон къордти къохи берæ æнтæстдзийнæдтæ ке бафтуйдзæй, йе дузæрдуккаг нæй.