Хӕдзӕртты хъармгӕнӕн афонмӕ цӕттӕ кӕнын райдайынц фыццаг уазӕлттӕй бирӕ раздӕр. Иу къӕпхӕн — ныккӕндтӕ бӕрӕг кӕнын. Ам специалисттӕ æрмæст сыгъдӕгдзинадмӕ нӕ кӕсынц. Уымӕл ӕмӕ рæдзагъд комкоммӕ сты ӕдасдзинады тас: газы хӕтӕлты ӕмӕ телты згæ ахӕм уавӕрты фæфылдæр вæййы, уымӕл къултӕ та “бахӕрынц” хъарм 15% онг, фатертӕм фæхæццæ уæвын æй нӕ уадзынц.
Афтæмæй хус ныккӕнд сыгъдæгдзинад нӕу, фӕлӕ у фӕрӕзтӕ фӕстауӕрц кӕнын ӕмӕ аваритӕй хъахъхъӕныны гæнæн. Ахӕм ӕркӕстытӕ кӕнынц республикӕйы ӕппӕт районты дӕр. Фæткхæлдтытæ куы сбӕрӕг кӕной, уӕд сӕ разамындæттæг организацийы аиуварс кӕнын хъӕуы хъармгӕнӕн сезоны райдианмæ. Ам дӕр ахсджиаг у юридикон æууæл: уый амынддзинад нӕу, фӕлӕ у хӕс. Ныккӕнд цӕттӕ куы нӕ уа, хӕтӕлтӕ та зымӕджы куы скъуыйой, уӕд бӕрнондзинад хауы разамындæттæг компанимӕ, æппæт æмбæлгæ ивартимæ.
Специалистты ныхӕстӕм гӕсгӕ сыгъдӕг ӕмӕ хус ныккӕнд ууыл дзурӕг у, ӕмӕ хӕдзар цӕттӕ у сезоны уӕзмӕ, уӕдӕ зымӕг дӕр ацӕудзӕн ӕнӕ къуылымпытæй. Зӕгъӕм, Алагиры иуӕй-иу ныккӕндты уавӕр ныридӕгӕн ӕвӕстиатӕй бахъуыд хуыздæр кæнын. Пъланмæ гæсгæ ӕркасты рӕстӕг специалисттӕ ам ссардтой дон ӕмӕ лӕсӕнтӕ. Фарстатæ афоныл куы нӕ аиуварс кӕнай, уӕд зымӕджы гӕнӕн ис ӕмӕ расайа хӕтӕлты аваритӕм ӕмӕ, афтæмæй уӕлæмхасæн цалцӕджы егъау хӕрдзтӕм.
Ахӕм хӕдзӕртты райст фӕстӕдӕрмӕ ӕргъӕвд цӕуы. Фыццаг разамындæттæг компанийы хӕс у ӕппӕт цухдзинæдтæ аиуварс кӕнын, ӕмӕ ӕрмӕстдӕр уӕд ис цӕттӕдзинады акт саразӕн. Регламентмӕ гӕсгӕ срастгӕнинӕгтӕн дӕттынц 10 кусгӕ боны онг, фӕлӕ практикӕ ӕвдисы: уыцы ӕмгъуыд арӕх нӕ фаг кӕны. Ӕнӕ бафыст актӕй ресурсон кусджытӕн уыцы хӕдзармӕ хъарм ауадзыны бар нӕй — нысангонд графикӕй рахауы. Фӕстиуджытӕ? – Ивартӕ! Фӕлӕ уыдон хъуыддаджы иу хай. Сӕйрагдӕр — цӕрджытӕн тӕссаг у фыццаг уазӕлттыл æнæкусгæ хъармгæнæнтимæ сӕмбӕлынӕй.
Фӕлӕ куыст нӕ лæууы. Къамистӕ ӕрвылбон цӕуынц ног адристӕм. Басгӕрсты пълан фыст у сентябры ӕмбисмӕ. Хӕс иу у: хъарм куы радтой, уӕдмӕ иу ныккӕнд дӕр хъуамӕ уымæлæй ма баззайа. Алы фӕдзӕхст дӕр — цӕстдарды бын. Кӕронбӕттӕн у хуымӕтӕг: абон басгӕрст цас хӕрзхъӕддӕр уа, уыйас зымӕг сабырдӕр у цӕрджытӕн ӕмӕ коммуналон службæйы специалисттæн. Ныр алцыдӕр аразгӕ у разамындæттæг компанитӕ фæткхæлдтытæ аиуварс кӕныныл цас рӕвдз бацархайой, уымӕй. Рӕстӕг ис — фӕлӕ къаддӕрӕй-къаддӕр кӕны.
Милдзыхты Амалия, Дзукъаты Маринæ
