Робототехникæйы сывæллæтты фестиваль сарæзтой Дзæуджыхъæуы. Архайдтой дзы 33 командæйы, æдæппæтæй 100 сабимæ `ввахс. Фестиваль «РобоКласс», зæгъгæ, фадат дæтты ацы хъуыдаджы фыццаг къахдзæфтæ акæнынæн. Дарддæр та хуыздæртæ сæхи равдисдзысты Цæгат Кавказы федералон зылды гом ерысты.
Республикæйы æвзонг инженертæ æнтыстджынæй ахуыр кæнынц компьютерон программæтæ. Сæхи къухæй сарæзтой, зæгъæм, ахæм чысыл гæрзтæ, сау хаххыл комкоммæ æнæ уæлдай æххуысæй чи цæуы. Уый тыххæй сыл сæвæрынц сæрмагонд бæрæггæнæнтæ иртасæн прибортæ, сæ куыст сын компьютерты фæрцы саразынц, афтæмæй.
Егъау æмæ уæндон фæндтæ равзæрдысты алагираг чысыл Даниил Гафуровы сæры. Куыд зæгъы, афтæмæй йæ фæлварæнтæ хæрзмæ сахадиккой зæхкусджыты фæллойыл.
Ацы фæсивæд дæр æрхъуыды кодтой раст хаххыл цæуæг гарз. Фæлæ фыццаджы хуызæн нæу. Уымæй хъауджыдæр ма йыл сæвæрдтой ультразæлтæ иртасæн дæр. Ахæм гарз йæхи истæуыл скъуырынмæ куы хъава, уæд æй уыцы иртасæн фыдбылызæй бахиздзæн.
Фæсивæды арæхстдзинадмæ йæ хъус æппынæдзух дары Алексей Котец – технопарк «Кванториум»-ы директор. Кæддæр йæхæдæг дæр ацы сывæллæтты бынаты уыдис. Уымæ дæр тынг цымыдисаг каст программæтæ фыссын.
Алексей Котецы фидарæй уырны, ацы сывæллæтæм стыр фидæн кæй æнхъæлмæ кæсы. Республикæйы сын уымæ гæсгæ сарæзтой æппæт фадæттæ дæр.
Робототехникæйы фестиваль сарæзта республикæйы ахуырад æмæ наукæйы министрад «Кванториум»-имæ иумæ. Сæ куыстытæ дзы равдыстой, 7 азæй 17 азы онг кæуыл цæуы, 100 ахæм сывæллоны. Чи фæуæлахиз уа, уыдонæн ракæндзысты зынаргъ лæвæрттæ.
Уазиты Зæлинæ
