Коронавирусы ныхмæ прививкæ скæнынмæ чи æрбацæуы, уыдоны нымæц Цæгат Ирыстоны рæзы. Прививкæгæнæн пунктты сæвзæры рад дæр. Зæгъæм, Дзæуджыхъæуы цыппæрæм поликлиникæйы. Вакцинаци ацæуын кæй фæнды, уыдоны нымæц, дыууæ къуырийы размæ абаргæйæ, дыууæ хатты фылдæр сты.
Дзæуджыхъæуы 4-æм поликлиникæмæ вакцинаци ацæуынмæ рады лæууы 30 адæймагæй фылдæр. Стæмтæй уæлдай, иууылдæр æрбацыдысты препараты фыццаг компонент скæнынмæ. Георгий Быстров у пенсиисæг. Цæуы йыл 70 азы. Зымæджы вирусы аххосæй йе ’нæниздзинад фæцудыдта, иммунитет фæлæмæгъдæр. Уымæ гæсгæ ацы хатт барвæндонæй сфæнд кодта прививкæ скæнын.
Инъекци скæныны размæ уал пациентмæ æркæсы терапевт. Вакцинæ ма ‘скӕнынӕн аххосæгтæ куы нæ разыны, уæд адæймаджы арвитынц прививкæмæ. Кæд Цæгат Ирыстоны вакцинаци афæдзæй фылдæр цæуы, уæддæр бирæтæ тæрсынц уæззау фæстиуджытæй. Дохтырты ныхæстæм гæсгæ, пациенттæн тас ницæмæй у.
Медиктæ куыд зæгъынц, афтæмæй æнæмæнг вакцинацийы фæтк куы сфидар, уæдæй фæстæмæ укол скæнынмæ фылдæр адæм цæуын райдыдта.
Абоны бонмæ 4 -æм поликлиникæйы вакцинæйы фыццаг компонент скодтой 27 182 адæймаджы. Медицинон уагдоны фадат ис хуымæтæг гриппы ныхмæ прививкæ скæнын дæр. Æнæмæнг æууæл – дыууæ вакцинæйы ’хсæн хъуамæ рацæуа мæй.