Цæгат Ирыстоны фæфылдæр наркоманты нымæц

Федералон проект «Трезвая Россия», зæгъгæ, сарæзта, наркомантæ фылдæр кæм ис, Уæрæсейы уыцы регионты номхыгъд. Хъыгагæн, Цæгат Ирыстон дзы зæрдæлæууæн бæрæггæнæнтæй ницы равдыста. Уый нæ, фæлæ ма номхыгъды зынгæ фæцауддæр иннæтимæ абаргæйæ. Нæ республикæ ныр ахсы 60-æм бынат. Уый у рæстæмбис бæрæггæнæн. Æппæты фылдæр та наркомантæ разынд Мæскуыйы æмæ Челябинскы облæстты, стæй Хакасийы. Проекты амидингæнджытæ куыд фæнысан кодтой, афтæмæй, дам, зæгъæм, Мæскуыйы наркоманты нымæц фылдæр кæны мигрантты тыххæй. Уавæр тæккæ хуыздæр кæм у, уыцы регионты номхыгъдмæ та бахаудысты Ненецаг автономон зылд, Архангельскы облæст æмæ Цæцæны Республикæ. Сæ хатдзæгтæ скæнынæн проекты кусджытæ спайда кодтой статистикон бæрæггæнæнтæй, стæй æнæниздзинад хъахъхъæныны æмæ мидхъуыддæгты министрадты иртæстытæй. Проект æххæст кæныны рæстæг цы хабæрттæ рабæрæг сты, уыдон æрвыст æрцыдысты Уæрæсейы Хицауад, Федерацийы Совет æмæ регионты разамындтæм. Иртасджыты фæнды, цæмæй паддзахады æвæстиатæй снысан кæной ног æмæ ахадгæ мадзæлттæ фæсивæды наркотиктæй хизынæн. Уæрæсейы Хицауады пресс-службæйæ куыд фехъусын кодтой ацы сахатмæ, афтæмæй сæм проекты хатдзæгтæ бахæццæ сты.