Цæгат Ирыстоны фæндаггон фыдбылызты нымæц фæкъаддæр кæнын. Уый у республикæйы хицауады профилон къамисы куысты сæйраг нысан. Къамисы æмбырды æрныхас кодтой фароны статистикæйы бæрæггæнæнтыл æмæ фыбылызты аххосæгты тыххæй. Бæлвырддæр, нæ дарддæры æрмæджы.
725 фæндаггон фыдбылызы. Фæмард дзы 102 адæймаджы, 1047-æй та фесты цæфтæ. Ахæмтæ сты 2020 азы статистикæйы бæрæггæнæнтæ. Фæндаггон фыдбылызтæ бирæ аххосæгты тыххæй æрцæуынц. Арæхдæр – шофыртæ тагъд кæй фескъæрынц, уый. Уæдæ фæндаггон змæлды домæнтæ дæр нæ феххæст кæнынц. Фæндæгтыл æдасдзинадыл ныхас кодтой хицауады дзуаппдæттæг къамисы. Амыдта йæ хицауады сæрдары хæдивæг Томайты Ирбег.
Бæлвырддæр фæндæгтыл уавæры тыххæй радзырдта паддзахадон республикæйы автоинспекцийы управленийы разамонæджы хæстæ æххæстгæнæг Моурауты Таймураз. Куыд загъта, афтæмæй Цæгат Ирыстоны фæгдаггон бæллæхты номхыгъдмæ арæхдæр бахауынц хæдтулгæтæ кæрæдзийы ныццæвыны цаутæ. Шофыртæ скъуырынц фистæгцæуджыты дæр. Уыимæ ма, хæдтулгæтæ асхъиуынц фæндагæй, кæнæ та фæндаггон нысæнттæ сæ разæй ахæссынц.
Фæдаггон фыдбылызты нымæц фæкъаддæр кæнынæн стыр æххуыс сты къамисæн æмæ видеокамерæтæ. Цæгат Ирыстоны ис сæрмагонд цæстдарды 79 комплексы. Федералон æмæ регионалон фæндæгтыл ахуырадон кусæндæттæм æввахс сæвæрдтой барæй конд цæлхдуртæ. Бастдзинад æмæ информацион технологиты регионалон управленийы разамонæг Сæлбиты Аланы хъуыдымæ гæсгæ, уæлдай æргом здахын хъæуы адæммæ сæ иварты тыххæй информаци хæццæ кæныны хæсмæ.
Ныхас ма цыд æфсæнвæндæгтыл цæхгæрмæ ахизæнтыл. Куыд рабæрæг, афтæмæй Уæрæсейы æфсæнвæндæгты компани фæнд кæны тагъдцæуæг поезд снысан кæнын Дзæуджыхъæуы Туапсемæ. Ног балцвæд кусын райдайдзæн майы. Фæлæ уал уый агъоммæ хъæуы профилактикон куыст бакæнын. Уымæн æмæ æфсæнвæдæгтыл цæхгæрмæ ахизæнты уавæр зæрдæхсаинаг у. Уæлдайдæр, фыдбылызтæ арæхдæр кæм æрцæуы, уыцы бынæттæм.
Национ проекттæм дæр æргом аздæхтой æмбырды. Сæ руаджы зынгæ фæхуыздæр фæндæгты уавæр. Сцалцæг кодтой 53 объекты, снывыл кодтой фæндæгты 96 километры. Сæвæрдтой 950 фæндаггон нысаны. Зилынц фистæгæй цæуджыты фæндæгтæм, ивынц рухсдæттæн системæтæ, цалцæг кæнынц хидтæ. Кæд æмæ фæндæгты хæрзхъæддзинад хуыздæрырдæм ивы, уæддæр паддзахадон автоинспекцийы специалисттæ сидынц адæммæ къæрцхъусдæр уæвынмæ æмæ æдасдзинады домæнтæ æххæст кæнынмæ.
