Цæгат Ирыстоны кусæг балцы уыд Уæрæсейы экономикон рæзты министры хæдивæг Сергей Назаров. Федта арæзтадон объекттæ Беслæны æмæ Михайловскæйы. Равдыстой йын фидæны курорт «Мамысон»-ы фæзуат.
Сергей Назаров йæ кусæг балц райдыдта «Зæдты сахарæй». Делегацийы уæнгтæ æрымысыдысты Беслæны фыццæгæм скъолайы теракты амæттæгты. Бабæрæг кодтой скъолайы æрдæгхæлд спортивон зал. Сæвæрдтой дидинджытæ, уыцы æвирхъау цауты чи фæмард, уыдоны цыртдзæвæнтыл.
Сергей Меняйло æмæ Сергей Назаров фембæлдысты Беслæны мадæлтимæ дæр. Æрныхас кодтой сæ риссагдæр фарстатыл. Скъолайы бæстыхайы сараздзысты терроризмы профилактикæйы æппæтдунеон культурон-патриотон центр «Беслан. Школа №1.». Делегацийы уæнгтæн равдыстой проект. Фæнд кæнынц, бæстыхайæ цы баззад, уыдон бахъахъхъæнын. Сæфт хæйттыл та ногæй бакусдзысты мемориалон-историон центр саразынæн. Проект баххæст кæндзысты 2023 азмæ. Уымæн та бахъæудзæн 200 милуан сомæй фылдæр. 30 дзы рахай кæндзысты регионалон бюджетæй.
Беслæны дарддæр цæуы ног скъолайы арæзтад. Уыдзæн дзы 550 бынаты. Сергей Меняйло æмæ Сергей Назаров федтой, куыстытæ куыд цæуынц, уый. Объект аразын райдыдтой январы. Ныртæккæ архайынц бæстыхайы къултыл. Ацы аз декабры скъола байгом кæндзæн йæ дуæрттæ. Уый руаджы ахуырдзауты заууат бæстыхайæ ног агъуыстытæм ракæндзысты.
Делегаци федта Михайловскæйы скъола дæр. 40 азы дæргъы бæстыхай фыццаг хатт цалцæг кæнынц бындуронæй. Баивтой æппæт коммуникацитæ дæр. Ныртæккæ цæуынц мидæггаг куыстытæ. Баззад ма скъолайы алфамблай фæзуат снывыл кæнын. Июлы кæронмæ куыстытæ кæронмæ баххæст кæндзысты. Сергей Меняйло фæнысан кодта, объект хъуамæ цæттæ кӕй уа фæткмæ гæсгæ. Уыимæ ма бахæс кодта уæлæмхасæн кусæнгæрзты исфтонгады фарстайыл бакусын.
Регионы социалон æмæ экономикон рæзты фарстатыл Сергей Меняйло æмæ Сергей Назаров æрныхас кодтой республикæйы хицауады уæнгтимæ æмбырды. Уæрæсейы экономикон рæзты министры хæдивæг фæнысан кодта, йæ балцы сæйраг нысан кӕй у æппæт риссаг фарстатæм дӕр лæмбынæг æркæсын. Стæй сыл иумæйагæй бакусын.
Регионы разамонæг бузныджы ныхæстæ загъта Сергей Назаровæн, Ведомствæ Цæгат Ирыстонмæ бæстон йæ цæст кæй дары, уый тыххæй. Ахсджиаг фарстатæ аиуварс кæнæн ис ӕрмӕст æмгуыстады руаджы.
Кусæг балцы программæйы иннæ пункт – «Мамысон». Сергей Назаровæн равдыстой фидæны курорты фæзуат æмæ йæ базонгæ кодтой проектимæ. Йæ фыццаг хай цæттæ уыдзæн 2023 азы кæронмæ. Уæдмæ комплексы уыдзæн 774 бынаты. Фысымуæттæй уæлдай ма дзы уыдзæн хæрæндæттæ æмæ ирхæфсæн центртæ. Сифтонг кæндзысты ауыгъд æмæ хæххон къахдзоныгъты фæндæгтæ. Сергей Меняйло бахæс кодта куыстытæ афтæ баххæст кæнын, цæмæй курорт цæттæ уа 2023-2024 азты сезонмæ.
Хæххон къахдзоныгъты фæндæгты 82 километры æмæ 2 мин бынаты туристтæн. Уыдон сты курорт «Мамысон»-ы гæнæнтæ. Йæ бынат у, æмбал кæмæн нæй, ахæм. Проект у ахсджиаг канд республикæйæн нæ, фæлæ æнæхъæн Уæрæсейæн дæр. Экономикон рæзты федералон министрады пъланмæ гæсгæ Мамысон хъуамæ суа Цæгат Кавказы цыкурайы фæрдыг.
Хуасдзауты Алинæ