Цъæйы ацыдысты «Хæлардзинады кубок»-ы ерыстæ. Бацархайдтой дзы Цæгат Ирыстоны национ-культурон æхсæнадтæ. Мадзалы сæйраг хæс у алы адæмы культурæимæ хуыздæр базонгæ уæвын. Цъæйгомы балæууыд не сфæлдыстадон къорд дæр.
Культурон хъæздыгдзинад æмæ фыдæлтыккон æгъдæуттæ. Фæлладуадзæн бонты Цъæй æрбангом кодта Цæгат Ирыстоны национ-культурон æхсæнадтæ. Роман Чупинец у «Русь» æхсæнады минæвар. Куыд зæгъы, афтæмæй хи адæмы культурæ парахат кæнын – у ахсджиаг хъуыддаг. Хи тыххæй радзурын æмæ иннæ адæмыхæттыты минæвæрттæм байхъусын бантыст «Хæлардзинады Кубок»-ы ерысты.
Кæронбæттæн къæпхæнмæ рацыдысты 6 командæйы. Уыдон сæ зонындзинæдтæ æмæ арæхстдзинæдтæ равдыстой туризмы техникæйы, нæ республикæйы историйы конкурсы, хуыздæр хæринаггæнæджы æмæ зарæггӕнджыты æркасты.
Ерысты архайдтой 60 адæймаджы. Хæлардзинады кубокы архайджыты суазæг кодта альпинистон лагерь Цъæйы. Уæдæ туристон клуб «Алания»-йы минæвæрттæ та мадзал бацæттæ кодтой.
Уæлахиздзау райсдзæн сæрмагонд кубок. Æппæт архайджытæ дæр сæттынц – сæйрагдæр уый нæу. Ахсджиагдæр у национ культурон центрты ‘хсæн æнгомдзинад æмæ хæлар ахастытæ.
