Цæгат Кавказы Суворовы номыл училищæйы хъомылгæнинæгтæ бабæрæг кодтой ног комплексы арæзтад. Рацарзæт ахуыргæнæндоны фæзуат у 16 гектары.
Цæгат Кавказы Суворовы номыл училищæйы разамонæг, булкъон Тауытты Руслан курсанттæн равдыста ног бæстыхæйттæ, радзырдта сын цавæр ног объекттæ дзы фæзындзæн, уый тыххæй. Экскурси райдыдтой Хъæбатырты Аллейы. Уым нысангонд æрцыдысты зынгонд æфсæддон разамонджыты тыххæй хъусынгæнинæгтæ. Фæстæдæр ма дзы сæвæрдзысты æфсæддон техникæ дæр. Кæцыдæр корпусты ныридæггæн æххæст кæнынц мидæггаг куыстытæ. Курсанттæ сæхи цæстæй федтой арæзтад куыд цæуы, уый. 26 объекты арæзтадон куыстытæ æххæстгонд цæуынц дыууæ къæпхæнмæ гæсгæ. Фыццаг фæнд кæнынц фæуын ацы аз августы. Дыккаг кæронбæттæн къæпхæн фæуыдзæн 2021-æм азы.
Ног корпусы руаджы фадат уыдзæн курсантты нымæц дыууæ хатты фæфылдæр кæнын. Ахуырадон комплексы бынат уыдзæн 320 адæймагæн. Нырыккон домæнтæн дзуапп чи дæтты ахæм материалон-техникон базæ та фадат ратдзæн ахуырад бæрзонд æмвæзадыл аразын.
