Мæхæмæтты Ахуырбеджы ногæй равзæрстой Цæгат Ирыстоны паддзахадон университеты президентæй. Йæ кандитатурæйыл иузæрдионæй схъæлæс кодтой университеты ахуыргæндты советы æмбырды.
Ахуыргæндты Совет хатдзæгтæ скодта ивгъуыд азы куыстæн. Сæйраг мадзæлтты тыххæй радзырдта ректор Огъуаты Алан. Уæлдæр ахуыргæнæндоны байгом кодтой Ядерон иртæстыты иугонд институты Информацион центр. Æмгуыст кæнынц æппæт дунейы хъуыстгонд центримæ. Университеты байгом Касперскийы лабораторийы кафедрæ æмæ «Востоковедение» -йы кафедрæ. Уымæй уæлдай ЦИПУ-ы байгом æфсæддон ахуырадон центр, университет æмгуыст кæны Испани, Иран, Германи, Франци, Норвеги, Китай, Япони æмæ Америчы Иугонд Штатты уæлдæр ахуыргæнæндæттимæ. Уæрæсейы бындурон иртæстыты фонды конкурсты 8 хатты сси уæлахиздзау. Уагдоны минæвæрттæ дарддæр дæр архайдзысты федералон æмæ регионалон конкурсты. Республикæйы социалон-экономикон райрæзтмæ стыр æвæрæн кæй хæссы, уый тыххæй университеты разамындæн арфæ ракодта Хицауады сæрдар Тускъаты Таймураз.