Тохы бынаты уавæртæ хынцгæйæ мæнæ ахæм сур хинайæн уды хос у. Уæлдайдæр æфæсддонтæ дæргъвæтин рæстæг хæслæвæрд æххæст кæнынмæ куы вæййынц, уæд. Фæрæз æнцон архайд у – æрмæст хъæуы губкæйыл 50 миллилитры дон æркæнын, таддаг буар хорз ссыгъдæг кæны, йæ фæстæ хи рахсын нæ домы. Чысыл фæлыст бирæ бынат нæ ахсы, ис æй дзыппы нывæрæн æмæ дзы цыфæнды уавæрты дæр спайда кæнын.
Парæты фæстæ Цæгат Ирыстоны паддзахадон университеты ахуыргæнджытæ æмæ студенттæ ахæм сур хинайæнтæ цæттæ кæнынц нæ æфсæддонтæн. Кондады архайд зын нæу, йæ къæпхæнтæ йын уайтагъд базыдтой, зæгъынц æрыгон адæм. Бархионтæ зныгъæгыл æркæнынц сæрмагонд таддаг æмæ йæ нывæрынц уымæлæй йын тæссаг кæм нæ уыдзæн, ахæм дзæкъулы. Ахæм хуызы æфсæддонтæн æххуыс кæныны хъæппæрис разынд дизайны, рог промышленносты кондæгтæ цæттæ кæныны кафедрæйы хистæр ахуыргæнæг Байаты Эльзæмæ. Йæ бинонты дарæг ныртæккæ ис сæрмагонд æфсæддон операцийы бынаты. Йæ къорды арæх бахъæуы бирæ рæстæг хъæды архайын æмæ сур хинайæнтæ æфсæддонты æнæмæнг хъæуынц.
Эльзæ фыццаг кондады куыст хæдзары кодта, фæлæ йæ фæндыд хъомыс фæфылдæр кæнын, уый тыххæй студентты сразæнгард кодта хъуыддаджы бацархайынмæ. Фæсивæд уайтагъд сразы сты. Ныридæгæн сцæттæ кодтой 1 мин 500 комплекты. Парти хæстæгдæр рæстæг бынатмæ арвитдзысты.
Цæгат Ирыстоны паддзахадон университеты студенттæ æмæ ахуыргæнджытæ сæрмагонд операцийы фыццаг бонтæй фæстæмæ æххуыс кæнынц æфсæддонтæн. Уæлахиз чи хæстæгдæр кæны, уыдоны хыгъды æрлæууыдысты. Æппынæдзух арвитынц гуманитарон уæз, æххуыс кæнынц æнæмæнг хъæугæ дзауматæ сæмбырд кæнынæн. Сæхæдæг ма цæттæ кæнынц акъоппы цырæгътæ, сур хъæрмхуыппытæ æмæ сусæггæнæн хызтæ. Алцыдæр, цæмæй тохы бынаты нæ æфсæддонтæ ма фæтыхсой æмæ зоной сæ фарсмæ бæстæйы цæрджытæ кæй сты, уый.
