ЦИПУ æмæ республикон педагогон институты баиуы фæстæ институты кусджытæй ‘ппæтæн дæр ссардзысты куыст. Уый тыххæй пресс-конференцийы рæстæг фехъусын кодта университеты ректор Огъуаты Алан. Фæнысан кодта, специалисттæн ахуырады къабазы æнæмæнг кусæн бынæттæ кæй уыдзæн, уый. Уæлдæр ахуыргæнæндæттæ баиу кæныны уынаффæ рахастой 2017 азы. Ныр та фарстайыл сразы Сергей Меняйло. Хъуыддагыл ма бацархайдзысты цалдæр азы дæргъы. Уæдмæ та педагогон коллектив кусдзæн раздæрау. Дарддæр сын бар уыдзæн универститетмæ рацæуын. Æвзардзысты сæ конкурсы хатдзæгтæм гæсгæ.
Журналисттимæ пресс-конференцийы ма æрныхас кодтой æрыгон ахуыргæндтæн баххуыс кæныны проекттыл. 2021 азы фарста уæлдай ахсджиаг у. Уымæн æмæ президенты уынаффæмæ гæсгæ нымад у наукæ æмæ технологиты азыл.
