Цæгат Ирыстоны паддзахадон университеты цæттæ кæнынц ирон журналистикæйы студентты. Уыцы ахсджиаг куыст кæнын райдыдтой 2 азы размæ, нæ республикæйы сæргълæууæг Битарты Вячеславы уынаффæмæ гæсгæ. Студенттæн дыккæгæм курсы бар раттынц дарддæр сæ специализаци равзарынæн. Ныр сын уырыссаг æвзагæй уæлдай ма фæзынд фадат ирон дæр равзарын. Ацы аз ирон журналистикæ ахуыр кæныны фæнд чи скодта, уыцы студенттæ систы 6. Се ‘ппæт дæр разы сты, журналистискæйы сусæгдзинæдтæ сын мадæлон æвзагыл базоныны фадат кæй фæци, уымæй.
Къорды студенттæ ныридæгæн фыссынц газет «Рæстдзинад»-мæ. Уымæй уæлдай ма, се ‘рмæджытæ æрвитынц газет «Слово»-мæ дæр. Журналистикæйы факультеты декан Хæбæлаты Фатимæ куыд зæгъы, афтæмæй ацы къорды фæзынд нæ республикæйæн у тынг ахсджиаг. Йæ хъуыдымæ гæсгæ, 10-15 азы фæстæ ирон журналисттæ уæвгæ дæр нал уыдаид, нæ республикæйы ахæм къорд куы нæ фæзындаид ногæй, уæд.
