45 азмæ — фыццаг хатт. Црауы скъола бындуронæй цалцæг кæнын райдыдтой. Бæстыхай 1980-æм азы амад у. Ахуыргæнджытæ æмæ ныййарджытæ йæм бæргæ зылдысты, фæлæ фæстаг рæстæг æрмæст аивгæнæн куыстытæ фаг нæ уыдысты.
Скъола заууат уавæрмæ æрцыд. Уаргæ бон иу агъуыстыты цартæй тагъди. Национ проект “Фæсивæд æмæ сывæллæттæ”-йы æххуысæй рацарæзтмæ бавнæлдтой 10-æм февралы. Ныридæгæн æртыккаг уæладзыджы къулты сæрст æмæ пъолтæ скалдтой. Ныртæккæ 133 сывæллоны ахуыр кæнынц дыууæ радæй.
