Уæлæмхасæн ахуырады программæ аххæссыд Цæгат Ирыстоны нæуæдз фараст мин скъоладзауыл

Уæлæмхасæн ахуырады программæ аххæссыд Цæгат Ирыстоны нæуæдз фараст мин скъоладзауыл. Уыдон сты спортивон, техникон, экологон, сфæлдыстадон эстетикон здæхтыты цæттæгæнæн къордтæ. Уый тыххæй аппаратон æмбырды фехъусын кодта дзуапдæттæг министр Алыбегты Эллæ. Хъарм хæринагæй æххæст сты 58 мин 500 сывæллонæн, се ‘хсæн сæрмагонд æфсæддон операцийы архайджыты цот, уыдон сты 2 мин 500 скъоладзауы æмæ 1 мин 700 сывæллоны та хъыгдард æнæниздзинадимæ. Разæй фæззыгон хи дзæбæх кæнæн рæстæг. 160 ахуырадон кусæндоны æмæ уæлæмхасæн ахуырады центрты бындурыл байгом кæндзысты лагерьтæ. 2-æм октябры иумæйагæй сбæрæг кæндзысты Ахуыргæнæджы бон, Скъолайы агъоммæ ахуырады кусæджы бон æмæ Астæуккаг профессионалон ахуырады системæйы педагогы бон. “Мадзалмæ цæттæ стæм”,- фехъусын кодта министр. Ныхас цыд эпидемиологон уавæрыл дæр. Уæрæсейы фæлхасгæнджытæм цæстдарды управленийы бæрæггæнæнтæм гæсгæ, ивгъуыд къуыри æхснырсæгимæ медицинон кусæндæттæм æххуысмæ чи æрбацыд, уыдоны нымæц чысыл сырæзт. Коронавирусимæ фæнысан кодтой 9 цауы. Гриппæй прививкæ скодтой 86 мин адæймаджы, уыдонæй 23 мины сты сывæллæттæ. Æрдзырдтой æндæр темæтыл дæр. Хъармгæнæн сезонмæ цæттæгæнæн мадзæлттæ фæвæййынц. Æппæт муниципалон скондтæ дæр донæй ифтонггонд сты. Дзанайты Барис йе ‘ргом аздæхта æндæр ахсджиаг фарстатæм дæр.