Спортивон карьерæйæн бындур ныййарджытæ сæвæрдтой 12 азы размæ. Æрвылбоны тренировкæтæ, дæсгай ерыстæ — алы къæпхæны дæр иу Марк равдыста стыр фæразондзинад. Ушуйæ уæрæсейаг-китайаг хъæзтытæм лæппу йæхи цæттæ кодта уæлдай бæстонæй.
Хъæзтыты размæ фæстаг мæй уыд уæлдай ахсджиаг. Спортсмен бæстон бакуыста алы архайдыл дæр, уæлдæр кодта йæ арæхстдзинад. Фæлæ йын хъысмæт цыма йæ тыхтæ фæлвæрдта. Ерыстæй дыууæ къуырийы размæ йæ къух асаст, уый бирæтыл æвзæры ‘рдæм фæзындаид, фæлæ Маркыл нæ.
Уæззау цæф, æнæмæнг, йæ тыхстыл фæзынд. Фæлæ ныфс æмæ уды фидардзинад баххуыс кодтой спортсменæн бынатмæ рахизын. Кæд зындзинæдтимæ фембæлд, уæддæр равдыста иттæг хорз бæрæггæнæнтæ. Тæрхонгæнджыты иумæйаг хъуыдыйæ Марк разынд хуыздæр.
Ноджы ма иу сыгъзæрин, ныр та уæгъдибар хъæбысхæстæй иугонд командæйы хыгъдмæ æрхаста Уырысты Баграт. 10-0. Ныфсджын уæлахиз китайаг ныхмæлæууæгыл æмæ аккаг фыццаг бынат. Спортсмен зæгъы, кæд æмæ йæ бæстон бакусын хъуыд, уæддæр хорз хатдзæгтыл нæ дызæрдыг кодта.
Баграт Хъæрæсе-Черкессийæ у. Спортæй 6 азы архайы, фыццаг къахдзæфтæ кодта йæ фыды разамындæй – ивгъуыды хъæбысæйхæцæг, ныр та тренер. Уый фæстæ æрцыд рæстæг дарддæр рæзынмæ æмæ фидæны чемпион рацыд Дзæуджыхъæумæ.
Æнæрлæугæ бæстон куысты фæрцы спортсмен йæхимæ æргом раздæхта. Хъуыстгонд клуб “Аланы”-мæ йæ фæхуыдта Фадзайты Арсен. Олимпаг хъæзтыты дыууæ хатты чемпион каст Баграты ныхмæлæудтæм æмæ йæ арæхстдзинадæй разыйæ баззад. Сидахъаты Зауырбег, Багаты Арслан æмæ Уалыты Владислав – номдзыд спорстментимæ фæрсæй-фарсмæ тренировкæтæ кæнын кадыл нымадта. Йæ æнтыстдзинæдтæм ын бирæ æнхъæлмæ кæсын нæ бахъуыд, афæдз фæстæ Багратмæ фæдзырдтой Уæрæсейы иугонд командæмæ. Куыд хатдзæг – ныфсджын уæлахиз Уæрæсейаг – китайаг хъæзтыты.
Разæй Баграт æмæ Маркмæ æнхъæлмæ кæсынц ног турниртæ. Стæм хатт сæ хъæуы сæ арæхстдзинад сбæлвырд кæнын. Фæлæ, спортсментæм кæсгæйæ æнæ дызæрдыгæй ис зæгъын – ацы лæппутæ цыфæнды фæлварæнтæм дæр цæттæ ‘сты.
