Сау денджызы былмæ абалц кæнын, кæнæ Волгæйыл круизы ацæуын. Уæрæсейы рæсугъд бынæттæ дисы бафтаудзысты фæлтæрдджын туристы дæр. Ныр та ма балцыл цы фæрæзтæ схардз кæнынц, уыдоны кæцыдæр хай фæстæмæ райсæн ис. Ивгъуыд аз нæ бæстæйы райдыдта кешбэкы программæ кусын. Президенты уынаффæмæ гæсгæ йæ адæргъвæтин кодтой ацы азы кæронмæ. Куыд райсæн ис кешбэк æмæ фæрæзтæй цас раздæхдзысты фæстæмæ, уый тыххæй бæлвырддæр радзурдзæн нæ уацхæссæг Хуасдзауты Алинæ.
Цæгæраты Светланæ æд бинонтæ ацы аз сау денджызы былмæ ацыд апрелы. Фæндыд сæ климæт фæивын æмæ се ‘нæниздзинад фæхъæддыхæр кæнын. Сæ рæстæг хорз æмæ пайдаимæ арвыстой, уыимæ ма сыл æрцыд æхсызгон хабар. Балцы цы фæрæзтæ бахардз кодтой, уыдоны хай сæ бон сси фæстæмæ райсын. Светланæ йæ зыдта, мартъийы кэшбекы программæйы ног къæпхæн кæй райдыдта, уый. Æмæ дзы бацархайдта. Зæрдæмæдзæугæ бынат равзæрста æмæ сайт мирпутешествий.рф-ы йæ курдиат ныууагъта.
Кэшбекы программæ Уæрæсейы туризмы комитет снысан кодта ивгъуыд аз августы мидæггаг туризмы рæзтæн. Куыд райсæн ис кэшбек? Фыццаджыдæр хъæуы сайт мирпутешествий.рф-мæ бацæуын. Фенæн дзы ис æппæт балцвæдтæ æмæ бынæтты хыгъд дæр. Зæрдæмæдзæугæ бынат равзарын æмæ картæ «МИР»-æй онлайн хуызы бафидын. Уый у æнæмæнг æххæстгæнгæ домæн. Туристмæ фæстæмæ раздæхдзæн фæрæзты 20 проценты. Æппæты фылдæр райсæн ис – 20 мин сомы. Туристон кэшбекы программæ ацы азы кæронмæ ахæццæ кæнын бахæс кодта Владимир Путин Федералон æмбырдмæ нуыстуаны.
Туристтæн ма ис мæй, цæмæй равзарой фæззæджы кæм улæфдзысты, уый. Кешбеккимæ тур райсæн ис 31 августы онг. Фæрæзты хай фæстæмæ раздæхдзæн 5 боны æмгъуыдмæ. Уæрæсейы алы регионмæ дæр ацæуæн ис 1 октябрæй 24 декабры онг. Уыимæ, хъуамæ туристтæ дыууæ æхсæвæй къаддæр ма арвитой бынаты. Программæйы ныртæккæ архайынц 3 мин фысымуаты, туроператор æмæ круизтæ.
Кешбэк райсæн ис сывæллæттæн дæр. 15 сентябры онг самал кæнæн ис сабиты лагерьтæм путевкæтæ. Аргъæй фæстæмæ дзы райсæн ис 50 проценты. Кешбэкы программæйы архайы Цæгат Ирыстон дæр. Фæлæ, уал ныридæгæн райсæн ис регионы 2 бынаты.
Программæ цы рæстæг кусы, уæдмæ дзы спайда кодтой 2 милуан адæймагæй фылдæр. Балхæдтой 35 миллиард сомы бæрц туртæ. Фæстæмæ дзы раздæхт 6 миллиарды. Арæхдæр туристтæ цæуынц Краснодары край, Стъарапол æмæ Хъырыммæ. Уыимæ ма, Алтай æмæ Тюменьмæ.
