Нысантæ

«Æртæ чъирийы æви æртæ кæрдзыны? Куыд растдæр у», – фæрсы нæ равдыстмæ кæсæг. Дзуапп – нæ радон программæ «Нысантæ»-йы.

Ирон адӕм ӕрвылаздӕр Цыппурс ӕмӕ Ногбоны ‘хсӕн фӕбӕрӕг кӕнынц Бынаты æxcӕв. Иутӕ йӕ хонынц Бынаты бардуаджы ӕхсав, иннӕ та – Хӕйрӕджыты ӕхсӕв.

Нæ ном ирон цæмæн у? Нæ телеуынадмæ цы фарстытæ æрвитут, уыдонæй та иуæн дзуапп ратдзыстæм нæ радон равдыст «Нысанты». Нæ адæмыхатт «ирон» цæмæн хуыйны? Истори æмæ æвзагзонынад бæстон чи зоны, уыдоны æххуысæй æхсызгонæй дзуапп дæттæм.

Æгъдау раттын зонды хос у, адæмæн – удыбæстæ. Ирон лæгæн алкæддæр æмæ алкæмдæр йæ алы фезмæлд, йæ алы къахдзæф æмæ сныхас дæр бæлвырд фæткыл вæййынц. Абон уын уæ зæрдыл æрлæууын кæндзыстæм кæрæдзиимæ фембæлды æмæ фæйнæрдæм ацæуыны ‘гъдау. Равдисдзыстæм уын, хистæримæ цæугæйæ кæстæры бынат кæм хъуамæ уа, уый. Радзурдзыстæм зиан æмæ циндзинадмæ бацыды уагæвæрды тыххæй.

Фынджы æгъдау ирон адæммæ æрмæст хæрын, нуазын æмæ кæрæдзиимæ аныхас кæнынæн нæ уыд. Уый æнгом баст уыд уырнынад, царды уаг æмæ æхсæнадон ахастыты фæткæвæрдимæ. Уæдæ бæлвырддæр фынгæй сыстыны æгъдауы тыххæй дзурæм нæ равдыст «Нысанты». Æхсызгонæй уын æнхъæлмæ кæсдзыстæм уæ фарстатæм дæр.

Ирон адæммæ кæддæриддæр уыд кæрæдзимæ сдзурыны æмæ салам раттыны бæлвырд фæтк. Фембæлгæйæ салам куыд раттын хъæуы, стæй нæ цардмæ къух исыны æгъдау кæцæй æрбацыд? Дзырд «салам» цавæрæй ис баивæн? Уыцы фарстытæн дзуапп ссардзыстæм нæ радон равдыст «Нысантæ»-йы. Æхсызгонæй уын æнхъæлмæ кæсдзыстæм уæ фарстатæм дæр.