Кадджын, æвæджиауы рæсугъд æмæ рагон зæххытæй иу у Уæллаг Мызур. Уæлладжыры комы, бæрзонд хæхты хъæбысы, раст цæргæсты тæхæнты, æрбынат кодтой Стыр Мызуры хъæутæ: Сулæртæ, Гусойтæ, Уæллаг æмæ Дæллаг хъæутæ, Ногхъæу, Ксуртæ æмæ Сæхæгтæ.
Адæм ацы хæхбæсты 500-600 азы размæ куы æрцардысты, уæд дзы кæд цы фæнды тызмæт æрдзон уавæртæ уыдис, уæддæр ацы бæркадджын зæхх цыл йæ фарн бафтыдта, йæ фæрныгадæй цæ барæвдыдта. Стыр Мызуры мыггагæн бантыст, фæлтæртæй фæлтæрмæ дæтгæцæ, æрхæццæ кæнын мах дуджы онг сæ домбай рагфыдæлты дунеæмбарынад æмæ арф мидисджын цæрыны æмæ кувыны æгъдæуттæ.

Равдысты дыккаг хай. Фӕрнджын ӕмӕ цымыдисаг у ирон таурӕгъты дуне. Уый, сыгъзӕрин рӕхысы цӕгтау, фидар бӕтты ивгъуыд замантӕ абоны дугимӕ. Нӕ цӕстыты раз нын ӕрлӕууын кӕны рагон царды нывтӕ.

Цыдæриддæр ахсджиагдæр æмæ диссагдæр цаутæ цыдис æнусты дæргъы, уыдон баззадысты адæмы зæрдиаг мысинæгты. Историон æмæ мифологон æрмæджытæ, æрдзы æмæ дунейы сконды сусæгдзинæдтæ, арф мидисджын адæмон æгъдæуттæ æмæ хъайтарты сгуыхтытæ – æппæт уыцы хабæрттæ æвдыст æрцыдысты ирон таурæгъты.

Нæ дугӕй 5 мин азы раздӕр Кавказы ралæууыд бронзæйы заман. Ацы хӕхбӕсты йӕ фыццаг æртайын кодтой индоирайнаг адæм – астæ, ир. Уыцы рагон цæрджыты ӕвӕджиауы культурæйы æвдисæнтæ археологтæ схуыдтой тли-хъобайнаг, зӕгъгӕ. Къæмынтæ, Гæлиат, Доныфарс, Къумбултæ, Хъобан, Тли, Зæрæмæг æмæ бирæ æндæр рæтты цы æмбисонды дзауматӕ ссардæуыд, уыдон нырма бирæ фæлтæрты æфтаудзысты дисы. Разæнгард сӕ кæндзысты, цӕмӕй сын сæ сусæг мидис æргом кæной.

Абон уæ немæ балцы хонæм Уæлларджырмæ – Ирыстоны рагондæр æмæ стырдæр хъæу Æрхон бабæрæг кæнынмæ. Адæмон сфæлдыстады уацмыстæ куыд амонынц, афтæмæй Æрхонгомы бæрзонд адагмæ кæддæр балыгъдысты Сидæмоны байзæддæгтæ. Хъæуыл æмæ хъæуккæгтыл у нæ радон равдыст.

Нæ фыдæлтæ фыццагдæр цы зæххыты æрцардысты, уыдонæй иу у Туалгом. Цæгат Ирыстоны туалтæ цардысты Мамысон, Захъагом, Зруггом, Цми, Гуыркъуымты ком, Уарцъегом, Джинат æмæ Фаллаг комы. Уыдонæй бабæрæг кодтам Захъагом. Абоны мыггæгты фыдæлтæ дзы æрцардысты 15-16 æнусты. Æмæ дзы равзæрд 12 хъæуы.

Абон уæ хонæм Туалгомы 8 комæн се ‘стырдæр – Мамысонмæ. Ацы бынæттæ бирæ ирон мыггæгтæн балæвар кодтой æнусон фарн. Уый сомбоны дæр хъуамæ сæфт ма уа, æмæ фæлтæрæй фæлтæрмæ цæра сæ байзæддæгты туджы.

Дыгургомæн йæ хуссарырдыгæй, бæрзонд хæхты хъæбысы æрбынат кодта Ирыстоны рагондæр æмæ цымыдисагдæр кæмттæй иу – Уæллагком. Йæ цыппар хъæуæй æртæйæн сæ нæмттæ: Гæлиат, Къæмынтæ æмæ Дымтæ. Цыппæрæм хъæу Хуссары (Хонсар) рагæй ничиуал цæры. Афтæмæй та йæ заманы уыдис ирон цардыуаг æмæ культурæйы æвæджиауы хæзнадон.

Абон уæ балцы хонæм Ирыстоны рагондæр æмæ кадджындæр кæмттæй иу – Æрхонгоммæ. Комы хъæутæ: Дæй, Æрхон æмæ Луар нæ фыдæлты заманы хуыдтой Æртæ Луары. Ацы хатт уал бабæрæг кодтам Дæйыхъæу. Таурæгътæм гæсгæ, 15-æм æнусы фæстæ Дæйыхъæуы æрцардис Сидæмоны фырт Фæтта. Æмæ йæ фыртты фырттæй цы 24 мыггаджы равзæрд, уыдон нымад сты дæйыхъæуккæгтыл.

Ирыстоны алы комы дæр фенæн ис æрдзы амæй-ай рæсугъддæр нывтæ, алы хъæуы дæр амæй-ай цымыдисагдæр хабæрттæ базонæн йæ цард æмæ историйы тыххæй… Абон уæ мах хонæм балцы Куырттаты комы зæронддæр хъæутæй иу – Хидыхъусмæ.

Йæ ном ныр фылдæр зындгонд у, моладзандон дзы кæй сарæзтой ивгъуыд æнусы кæрон, уымæй. Фæлæ хъæуы истори у бирæ рагондæр. Хидыхъусы равзæрд баст у, фыццаджыдæр, Ос-Бæгъатыры æфсады раздзæуджытæй иу – Цымытиимæ. Таурæгъмæ гæсгæ, Цымытийы цыппар фыртæй равзæргæ мыггæгты руаджы, ацы хъæу сси астæуккаг æнусты фæстæ хъуыстгонд æмæ фидауцджын цæрæг хъæу. Йæ цардвæндаджы чиныджы фыст æрцыд бирæ цымыдисаг хабæрттæ æмæ уыдон сты фидæны фæлтæртæн дæр зæрдылдаринаг.