Аивадæн æгæрон тых ис. Адæймаджы йæ уацары райсы æмæ йæ нал суæгъд кæны. Нæ абоны уазæг дæд кæддæр бауарзта театр æмæ сценæйы рухсыты цæхæр. Йæ зæрдæйы цавæр арф хъуыдытæ ис, уый та нын нæ программæйы раргом кодта.

Нæ абоны уазæг йæ спортивон зонындзинӕдтӕ не ‘вгъау кæны кæстæртæн. Схъомыл кодта цалдæр фæлтæры. Бирæтæ дзы свæййынц уæлдæр хæрзиуджыты аккаг. Ӕмӕ кӕд се ‘нӕниздзинад хъыгдард кӕмӕн у, уыдонимӕ ӕнцон нӕу кусын, уӕддӕр нӕ уазӕг зындзинӕдтӕй нӕ тӕрсы. Цымӕ, йӕ цавӕр миниуджытыл дзурӕг у, уал азы йӕ куыстӕй кӕй не схъыг, уый? Йӕхи йын бафӕрсдзыстӕм. Ӕрбацыд нӕм тренер Гаглойты Валерий.

Адæймаг уарзон куыстыл хæст куы уа, уæд йæхицæн дæр æмæ иннæтæн дæр удæнцой æмæ æхсызгондзинад хæсдзæн. Нæ абоны уазæгæн йæ зæрдæ стыр у. Бирæтæ йæ хонынц «доктор Айболит». Фæлæ йæ зæрдæйы рæбыны та цавæр æнкъарæнтæ ис? Цымæ нын сæ басусæг кæндзæн? Нæ уазæг у зоолог Дзуццаты Зауырбег.

Цардвæндæгтæ алыхуызон æмæ алывæрсыг сты. Царды бæлццон уæвгæйæ, нæ алчидæр йæ размæ æвæры цавæрдæр хæс. Куыд æм цæуæм, цавæр фæндæгтыл æмæ кæимæ – уый нæхицæй аразгæ у. Уæвгæ, адæмы цардвæндæгтæ мæм цымыдисаг кæсынц. Хицæн кæнынц. Кæимæ æмбæлыдысты, цы цаутæн уыдысты æвдисæн, сæ зæрдыл цы бадардтой. Мæ абоны уазæг кæд нырма æрыгон у, уæддæр бирæ федта, бирæ адæмимæ фембæлд. Цы радзура, уый дæр куыд нæ ис.

Фæлæ йæхи зæрдæйы та цы æнкъарæнтæ ис, арæхдæр цы æрымысы, цы бæллицтæ йæм ис? Уымæй йын йæхи бафæрсдзынæн. Уазæгуаты та æнхъæлмæ кæсын Гæуæцæлты Русланмæ.

Нæ уазæг ирон æвзаг афтæ тынг уарзы, æмæ дзырдтæ фæрдгуытау æмбырд кæны, баиу сæ кæны æмæ равзæрынц æмдзæвгæтæ. Фæлæ йæхи зæрдæмæ та фæндаг кæуылты цæуы? Цы уарзы, аргъ цæмæн кæны? Уымæй бафарстам Баситы Зæлинæйы.

Зарæг — зæрдæмæ фæндаг хуымæтæджы нæ хонынц. Уæдæ нын уарзон зарджытæ æмæ зарæггæнджытæ дæр куыд нæ ис! Aбон фембæлдыстæм Теблойты Владиславимæ.

Камерæмæ кæй сисай, уый аивæн нал ис. Баззайдзæн историон æвдисæнæй. Документалон киноисджыты фæрцы фидæны фæлтæртæн уыдзæн абоны цард хуыздæр æмбарыны фадат. Фæлæ ахæм кинонывты автортæ аивады ацы хуыз цæмæ бауарзтой? Цы сусæгдзинад дзы ис? Уый тыххæй нын радзырдта Цориты Солтан. Йæ цард ацы жанримæ раджы сбаста.

Цымæ рæстæгæн бауромæн ис? Зын фарст у… Фæлæ цыма хуызистытæ ӕмӕ нывты афӕстиат вӕййы, цыма ивгъуыдмæ абалц кӕнӕм, хатгай афтæ фæкæсы адӕймагмӕ. Цæстытыл ногӕй ауайынц зæрдæйæн зынаргъ цаутӕ… Уӕдӕ уыцы къамтæ æмæ нывтæ чи скæны, уыдон та сæхæдæг цæуыл ахъуыды кæнынц? Сæ зæрдыл цавæр хабӕрттӕ ‘рбалæууынц? Сæ нывты сæхи цард зыны? Уымæй бафӕрсдзыстӕм нӕ уазæджы. Саккаг нӕм кодта Мæргъиты Таймураз.

Нæ абоны уазæджы республикæйы бирӕтӕ зонынц йӕ зонадон уацхъуыдтæм гæсгæ. Ӕгуыстӕй та йӕ уӕвгӕ дӕр никуы фендзынӕ. Уӕдӕ йӕ удыхъӕдӕй дӕр адӕймаджы зӕрдӕ балхӕны. Кæддæриддæр у худæндзаст, кӕны фæлмæн æмæ зæрдиаг ныхас. Нæ зæрдæ дарӕм, ныронг цы сусӕг кодта, уыдӕттӕй нын кӕд исты схъӕр кӕнид. Афтӕмӕй Тъехты Тамерланы хъуамӕ базонӕм ноджы хуыздӕр.

Нæ программæйы архайæгæн бирæ æнтысы. Æххæсы алыхуызон куыстытыл: бирæтæн ахуыргæнæг у, кæмæндæр — æххуысгæнæг, чидæр та йæ уацхъуыдтæй ног хабæрттæ базоны. Фæлæ йæхицæн сæйрагдæр хъуыддагыл цы нымайы? Йæ размæ цавæр хæстæ æвæры, йæ мæт, йæ сагъæс цы у? Ацы фарстытæн нын дзуапп радта Бæзыты Ларисæ.