Бирæ цымыдисаг хабæрттæн уыдысты æвдисæн Ирыстоны хæхбæстæ.

Цалдæр æнусы размæ иу æмбисонды цау æрцыди Дыгургомы, Махческы хъæуы. Уæд зæдтæ райстой сæхимæ, уæлæрвтæм, уæздан зæххон чызг – Гуырмеханы. Уæдæй абонмæ уый йæ арм дары йæ комбæстыл æмæ уæдæй абонмæ адæм цæуынц йæ кувæндонмæ, сæхи сæ уæларвон хойыл бафæдзæхсынмæ.

Абон Будайты-Бæзиты Олгайыл цæуы 93 азы, цæры Дзæуджыхъæуы, фæлæ тынг хорз хъуыды кæны йæ райгуырæн хъæу Задæлесчы рæсугъд, уæздан цард. Хистæртæй æрыхъуыста йæ мыггаджы равзæрд æмæ кадджын лæгты цардвæндæгты хабæрттæ. Абон уыдæттæ йæхицæй уæлдай ничиуал зоны, уымæ гæсгæ, сфæнд кодта уыцы зынаргъ мысинæгтæ ныууадзын фидæны фæлтæртæн йæ ног чиныг «Бæзитæ»-йы.

Дыгургомы рæбыны, Стыр Дыгуры зылды, æвæджиауы рæсугъд æрдзы хъæбысы æрбынат кодта рагон хъæу Ахсау. Ардыгæй рацæугæ мыггæгтæ сæ бастдзинад райгуырæн зæххимæ кæй нæ сафынц, ууыл дзурæг у хъæуы астæу Бузойты ног амад мæсыг æмæ æппæт мыггæгты иумæйаг зæрдиаг архайд Билаги Елиайы бæрæгбоны рæстæг.

Ничи зæгъдзæн, кæцы заманы равзæрд Дыгургомы рæбинаг комы æмбисонды хæххон сахар – Гæлиат. Йæ алæмæты рæсугъд мæсгуытæ æмæ гæнахтæ сты нæ фыдæлты куырыхон зонд, тых æмæ хъаруйы æвæджиауы æвдисæнтæ. Уымæй уæлдай ацы зæххы баззад бирæ фæлтæрты фарн. Нæ зæдæнгæс фыдæлтæ ам цы арф уидæгтæ ауагътой, уыдон баст сты нæ зæрдæтимæ сыгъзæрин рæхыстæй æмæ нæ уымæн афтæ тынг æлвасынц сæхимæ.