2024-æм азмæ Ирыстоны ацæргæ адæмæн сараздзысты ног хуызы хæдзар-интернат. Уæвгæ дзы канд ацæргæ адæм нæ уыдзысты. Фæлæ ма йе ‘нæниздзинад хъыгдард кæмæн у, уыдон дæр.
Арæзтад райдайдзæн национ проект «Демографи»-мæ гæсгæ. Цæгат Ирыстоны фæллойы æмæ социалон рæзты министр Хуыбаты Барисы ныхæстæм гæсгæ, объект фæзындзæн Горæтгæрон районы Черменыхъæуы.
Бынат дзы уыдзæн 150 адæймагæн. Уæвгæ уын ацы хабар æнæзонгæ нæу, ныхас ыл цыди уымæй размæ дæр. Фæлæ ацы темæйыл сфæнд кодтам бæстондæр æрныхас кæнын, хæрз æрæджы мæнæ ахæм бæрæггæнæнтыл кæй сæмбæлдыстæм, уый тыххæй.
Федералон статистикон службæйы хъусынгæнинагмæ гæсгæ, 2025-æм азмæ Уæрæсейы пенсиисджыты нымæц фæуыдзæн 27% фылдæр. Куыд цæттæ у нæ бæстæ уыцы хъуыддагмæ, æмæ цы уавæртæ арæзт цæудзæн Ирыстоны ацæргæ æмæ æгуыст адæмы цард фæхуыздæр кæнынæн? Ууыл дзурдзыстæм Цæгæраты Русланимæ — организаци «Адæмон Фронт»-ы регионалон штабы æмсæрдар, Туаты Русланимæ — Дзæуджыхъæуы Терчыфалейы зылды «Иры Стыр ныхас»-ы сæрдар, Дзанайты Маринæимæ — скъола-интернат «Надежда»-йы психолог, Алæгаты Аланимæ — скъола-интернат «Надежда»-йы раздæры хъомылгæнинаг æмæ Косты Маратимææхсæнадон организаци «Уæрæсейы фæсивæды Цæдисы» уæнг.
Федералон специалистты ныхæстæм гæсгæ, ног хуызы хæдзар-интренатты райрæзт ахъаз уыдзæн ацæргæ адæмæн хуыздæр лæггад кæнынæн. Зæрæттæн дзы кæндзысты медицинон æххуыс, сараздзысты сын реабилитацион-фæлладуадзæн бынæттæ. Æмткæй, интернатты цæрыны уавæртæ хæстæг уыдзысты хи хæдзæртты уавæртæм.