Фыдыбæстæйы Стыр хæсты уынæр нæма фæцис, афтæ паддзахад адæмы æмæ æхсæнады размæ сæвæрдта ног хæстæ. Зæгъæм, культурæ æмæ аивады.
Аивады æппæт хуызтæй та сæйрагдæр кино кæй у, уый æмбаргæйæ, Советон Цæдисы хицауад рахаста уынаффæ — саразын ног киностудитæ, чи ис, уыдоны куыст та сног кæнын. Сæ фыццæгтæй иу уыд Дзæуджыхъæуы.
Официалон бæрæггæнæнтæм гæсгæ, фæзынд 1943 азы, Цæгат Кавказы кинохроникæйы студи Ростовæй Дзæуджыхъæумæ эвакуаци куы скодтой, уæд. Уæдæй фæстæмæ райдыдта цæгатирыстойнаг кинойы дуг. Цавæр кинонывтæ уыдысты, чи дзы куыста æмæ сæ чи иста, кæй фæрцы айхъуыст ирон кинойы кой æмæ цæмæн бамынæг, ууыл уыдзæн нæ абоны ныхас.