Ацы аз нысангонд арцыд наукæйы æмæ ног технологиты афæдзыл. Ирыстоны кæстæртæ рагæй-æрæгмæ дæр наукæйы уæндон къахдзæфтæ кæнынц. Уымæ гæсгæ, ацы равдысты æрныхас кæндзыстæм æрвылазон конкурс «Фидæнмæ къахдзæф»-ыл. Уымæй уæлдай ма абон у риелторы бон дæр. Сæ куысты сусæгдзинæдты æмæ зындзинæдты тыххæй нын радзурдзæн нæ студийы уазæг.

Рагæй-æрæгмæ дæр адæймаг æмæ бæхы `хсæн лымæндзинад дисы æфтауы. Нæ фыдæлтæ-иу бæх адавыны хъуыддаг фыдмийыл нымадтой, æмæ йæ хуыдтой туг сисыны аккаг. Бæхты тыххæй нын ацы райсом нæ зонындзинæдтæ фæфылдæр кæндзысты не студийы уазджытæ.

Абон у хорз зæрдæйы ахасты бон. Фæстаг рæстæг сарæх сты бæрæгбонтæ аразæг куыстуæттæ. Куыд цæуы сæ куыст, стæй куыд бахъæлдзæг кæнынц адæмы зæрдæтæ? Уый та нын радзурдзæн нæ студийы уазæг — хъæлдзæг мадзæлттæ аразæг. Уымæй уæлдай ма абон у хъармхуыпп æмæ зокъоты бон дæр. Уæвгæ уын бацæттæ кодтам зокъоты нæ, фæлæ хъайлайы хæрзад рецепт.

Æхсæвæй-бонмæ рынчынты уæлхъус! Сылгоймæгтæй дохтырæй чи кусы, абон уыдоны профессионалон бон у. Кæддæр сæ медицинæмæ хæстæг дæр нæ уагътой. Фæлæ рæстæг аивта, æмæ ныртæккæ сылгоймæгтæ ацы дæсныйады æнтысджынæй сæхи æвдисынц. Уæвгæ, сæ бон цыфæнды куысты дæр хорз бæрæггæнæнтæ равдисын у. Æмæ ма нæ студимæ æрбахуыдтам, æфсæйнаг машинæтæ чи тæры, ахæм сылгомаджы.

Абон æппæт дунейы дæр бæрæг кæнынц балеты кусæджы профессионалон бон. Куыд аивады хуыз, афтæмæй балет фæзынди 15-16-æм æнусты Италийы. Ныртæккæ махæн театралон равдыстмæ ацæуæн нæй, фæлæ ссардтам æндæр мадзал. Кафæджы дæсныйады сусæгдзинæдтæ нын раргом кæндзæн не студийы уазæг.

Уæдæ 1997-æм азы Америкæйы скодтой фыццаг экологон акци. Йæ сæйраг хæс уыди, чи нал хъæуы, уыцы гæххæттæй ногæй спайда кæнын. Макулатурæ æмбырд кæныны хъуыддаг Советон Цæдисы тынг вазыгджын бынат ахста. Уæдæ цымæ ныртæккæ та куыд цæуы куыст? Не студийы уазæг ацы хабæрттæн мæнæй хуыздæр ратдзæн дзуапп.

Цыбыр рæстæджы фæстæ йæхимæ бартæ райсдзæн уалдзæг æмæ та бирæты ног хъуыддæгтæм сразæнгард кæндзæн. Ацафон адæмы æмбис се `ргом аздахынц сæхимæ базилынмæ. Æмæ уыцы хъуыддаджы тыххæй æрныхас кодтам не студийы уазæг – диетологимæ. Уымæй уæлдай ма коктейль скодтам къофийæ.

Ныртæккæ интернеты ис бирæ алыхуызон цымыдисаг æрмæджытæ. Адæймаг дзы цы нæ фендзæн, ахæм нæй. Уымæй уæлдай ма дзы ныртæккæ пайда кæнынц куыд кæстæртæ, афтæ хистæртæ дæр. Цы пайда сты æхсæнадæн æмæ сæ цæй тыххæй исынц, уый та базондзыстæм нæ программæйы.

Цалдæр азы размæ хъæуккаг сывæллæттæн фæзындис фæсурокты рæстæг цымыдисагдæрæй æрвитыны фадат. Районты, иу иннæйы фæстæ гом кæнын райдыдтой къордтæ «Точка роста». Сывæллæттæ дзы фылдæр кæнынц сæ зонындзинæдтæ, сæхи ирхæфсынц. Уæвгæ, хи ирхæфсыны хъуыддаг бæрзонд æвæрд уыд нæ рагфыдæлтæм дæр. Нæ программæйы уазæг раиртæста, цалдæр æнусы размæ дæр ирæттæ шашкæтæй кæй хъазыдысты, уый.

Абон æнæхъæн дунейы дæр бæрæг кæнынц шоколадæй конд тъортты бон. Уыцы адджинаг кæд фæзындис, уый зын зæгъæн у, фæлæ 1828-æм азы какаойы хъæдуртæй кæнын райдыдтой зети æмæ ссад. Шоколадæй конд хæринæгтæ æрмæст сывæллæттæ нæ уарзынц. Сæ саразыны зындзинæдтыл æмæ сæ пайдайыл дзурæм нæ программæйы.

Сæ профессионалон бæрæгбон æппæт дунейы дæр бæрæг кæнынц таможняйы кусджытæ. Нырыккон царды уавæртæ сæ домынц стыр бæрнондзинад, æвæллайгæ фæллой æмæ профессионализм. Азæй-азмæ нæ къæлиндар хъæздыгдæр кæны алыхуызон бæрæгбæттæй. Уыдон хорзырдæм ахадынц царды уагыл, æмæ нын фылдæр хатт нæ зæрдыл æрлæууын кæнынц, царды мидæг ахсджиагдæр цы у, уыцы хъуыддæгтæ. Уæдæ ма абон у æмкъæйтты бон дæр. Бинонты `хсæн ахастдзинæдты тыххæй нын радзурдзысты нæ программæйы архайджытæ.