Цымӕ нӕ диссӕгтыл бирӕтӕ ӕууӕндынц?
Уый нӕ зонын. Фӕлӕ циндзинӕдтӕм ӕмӕ хорздзинӕдтӕм алчидӕр тырны. Уыдон та къухы ӕнцондӕрӕй ӕфтынц цымыдисаг дзаумайы руаджы.
Цы у, уый программӕ «цы сусӕг кӕныс»-ы уазджытӕ зонынц…
Дӕгъӕл…
Зӕрдӕтӕ ӕмӕ царды фӕндӕгтӕ чи гом кӕны, ахӕм.
Мӕнӕн рауад 100 адӕймагимӕ фембӕлын, 100 зӕрдӕйы дуары байгом кӕнын, 100 цардвӕндаджы базонын…
Абон программӕйӕн у йӕ
100-йӕм рауагъд.
Чысыл юбилей ӕмӕ иумӕ сбӕрӕг кӕнӕм.

Наукон æмæ æхсæнадон куыст, политикæ æмæ аив литературæ, сабырдзинад хъахъхъæнæг æмæ хорз æмбал. Куыд уæм кæсы, æппæт ацы миниуджытæ иу адæймаджы баиу вæййынц? Мæхимæ дæр цымыдисаг кæсы.
Фæлæ, дам, адæймаджы цæст уынаг у. Æмæ кæй загътон уыцы миниуджытæй хайджын адæймагыл нымайынц мæ абоны уазæджы.
Йæ фыдæн аккаг кæстæр, йæ райгуырæн зæхх æмæ йæ адæмы чи уарзы, ахæм нæлгоймаг.
Тынг мæ фæнды йæ хъуыдытæ, йæ цæстæнгас базонын æмæ йæм а-изæр æнхъæлмæ кæсын уазæгуаты. Чи у? Цыбырты Алексей.

Республикæйы исты цау куы æрцæуы, уæд æппæты фыццаг бынатмæ чи атындзы, уыдонимæ вæййынц уацхæсджытæ дæр.
Афтæ куы зæгъон æмæ мæ абоны уазæг бирæ цаутæн æвдисæн уыд, йæхи цæстæй бирæ федта, уæд нæ фæрæдидзынæн. Йæ фæллойадон фæндаг цымыдисаг у? Мæнмæ гæсгæ – о.
Фæлæ нæ алчидæр, фыццаджыдæр, адæймаг у. Йе нкъарæнтимæ, йæ цинтæ æмæ сагъæстимæ, йæ бæллицтимæ…

Æдзух хъæлдзæг æмæ цыргъзонд, æдзух æмбæлтты хсæн – алкæйыдæр æй фæнды барæвдауын. Кæддæр мын йæхæдæг куыд загъта, афтæмæй йæ фæнды иннæтæн хорздзинад кæнын.

Йæ биографи дæр цымыдисаг у: у актер æмæ режиссёр, фыд æмæ разамонæг, баст уыд театр æмæ киноимæ… Фæлæ йын хæстæгдæр та цы у? Царды дæр рольтæ хъазы?

Уымæй йын йæхи бафæрсдзынæн.

Нæ программæйы уазæг у Косты Георгий.

Ацы зарæг чи нæ зоны, ахæм адæймаг, æвæццæгæн, зын ссарæн у. Æмæ се ппæтæн дæр у уарзон. Уыимæ куыд аивадуарзджытæн, афтæ музыканттæн дæр. Кæд, мыййаг, уымæн ис сæ репертуары.

Мæ абоны уазæджы республикæйы бирæтæ зонынц. Кæд лæгæй-лæгмæ се ппæт нæ, уæддæр йæ ном хъуыстгонд у.
Æз та йемæ куы фембæлын, уæд ахъуыды кæны – цымæ æрдзы æгомыг æвзаг зоны? Уæлдайдæр та дурты. Æвæццæгæн ахъуыды кодтат, мæ уазæг скульптор у, зæгъгæ. Нæу, фæлæ йæ дæсныйады къаддæр аивдзинад нæй. Уыимæ ма мæ уазæг æмæ йе мкусджыты фæрцы нæ алфамбылай кæны рæсугъддæр æмæ аивдæр. Сцымыдис уæ кодтон кæй хонын, уый?
Схъæр уын æй кæндзынæн – абон мæ уазæг у зындгонд архитектор Алыккаты Руслан.

Ахæм хъуыдытæ фæзынынц нæ уазæгимæ фембæлгæйæ дæр. Егъау æхсæнадон куыст кæны æмæ йыл афтæ æнувыд цæмæн у? Йæ мæт, йæ рис цы сты? Цымæ нын сæ схъæр кæндзæн? Зæрдиагæй аныхас кодтам Махъоты Иринæимæ.

Налдыхъуаты Зæлинӕ республикæйы цæрджытæн тынг уарзон адæймаг у. Йæ хъæлæс фехъусгæйæ, алчидæр мидбылты бахуды. Схъæр уын æй кæндзынæн, чидæртæ йемæ дардмæ ныхас кæнын дæр райдайынц. Ӕхсызгонӕй кӕй хъæлæсмæ фӕхъусæм, уыцы рӕсугъд адӕймаг у нæ уазæг.

Адæмы хсæн ахæм ныхас баззад: «Низмæ йæ къух ничи бадары», зæгъгæ, æмæ Хуыцау се ппæтæн дæр æнæниздзинад балæвар кæнæд. Æз та кæддæриддæр ахъуыды кæнын дохтыртыл. Æвæдза, куыд ахсджиаг у дæсны специалисты къухмæ бахауын. Сæйрагдæр та ма дæм хионы цæстæй куыд ракæса, дæ рис дын куыд æмбара.

Ахæм адæймаг хонынц мæ абоны уазæджы дæр. Алкæддæр дæм худæндзастæй ракæсдзæн, зæрдиагæй аныхас кæндзæн демæ, баххуыс кæндзæн. Уый та у йæ дæсныйад зæрдæй чи равзæрста, ахæм дохтыры миниуæг. Цымыдисаг адæймаг мæм кæсы. Чи у? Нæ уын æй басусæг кæндзынæн. Уазæгуаты æнхъæлмæ кæсын Хъараты Сосланмæ.

Мæ абоны уазæг йæ мадæлон æвзаг æмæ йæ адæмыл тынг æнувыд у. Æгæрон уарзтæй сæ уарзы куы зæгъон, уæддæр стыр ныхæстæ нæ уыдзысты. Йæ цард снывонд кодта æвзагзонынадæн. Æз æй цас зонын, кæддæриддæр архайдта ирон æвзаг кæстæртæн бауарзын кæныныл. Ныртæккæ дзы бирæ студенттæ сты бузныг, йæхи ахуыргæнджытæ та дзы сæрæстыр сты. Мæхæдæг дæр йемæ абитуриент уæвгæйæ, базонгæ дæн. Æмæ кæд рæстæг рацыд, уæддæр мын, раздæрау, у уарзон æмæ фæзминаг ахуыргæнæг, цымыдисаг адæймаг æмæ рæсугъд уды хицау Абон та Куыдзойты Анжелæ у мæ уазæг.