Йе стыр курдиат æмæ йæ рæсугъд зæрдæйæ Иры дзыллæйæн кад чи кодта, ирон уæздан зарæгæй адæмы зæрдæтæм фæндаг чи ссардта, фырбуцæн «Иры булæмæргъ» кæй хуыдтой, уый уыдис Уæрæсейы Федерацийы сгуыхт артист Баллаты Валодя.

Зæххыл мадæй зынаргъдæр ничи ис, поэты загъдау, нæртон дзырдтæн сæ фæлмæндæр у мад. Баллаты Валодяйы «Мады зарæг» ирон аивады сызгъæрин къæбицы хæзнатæй иу у.

Уалдзыгон зарæг… Уалдзæджы хуызæн рæсугъд уыд йæ диссаджы хъæлæсы уагæй курдиатджын зарæггæнæг, Уæрæсейы Федерацийы сгуыхт артисткæ, Цæгат Ирыстоны музыкалон театры солисткæ Тогойты Таиссия. Ирон аивады хæзнадонмæ Таисæ бахаста бирæ рæсугъд зарджытæ, адæмæн йæхи бауарзын кодта йе стыр курдиатæй, йæ рæсугъд, сыгъдæг суадоны хуызæн хъæлæсæй, æмæ уымæй йæ дзыллæйы зæрдæмæ хаста стыр æхсызгондзинад.

Алы зарӕгӕн дӕр ирон адӕмы сфӕлдыстады ис йӕхи цӕрӕнбон, йӕхи истори. Уӕлдай бынат ахсынц нӕ фыдӕлты сфӕлдыстады ӕхсар ӕмӕ лӕгдзинады зарджытӕ.

Тлаттаты Чермен… Ӕрӕджы дӕр ма фехъусӕн уыдис хистӕртӕй Чермены удыхъӕды миниуджыты тыххӕй. Куыд дзырдтой, афтӕмӕй Чермен уыдис ӕмбисонды уындджын ӕмӕ хӕрзконд лӕппулӕг. Уыдис фӕлмӕнзӕрдӕ ӕмӕ адӕмуарзаг, хуымӕтӕг ӕмӕ зӕрдӕхӕлар. Чермен уыд мӕгуыр хӕххон адӕмы цӕугӕ мӕсыг, ӕмӕ цалынмӕ ирон адӕм цӕрой, уӕдмӕ цӕрдзӕн ӕмӕ Ирыстоны зӕлдзӕн Чермены зарӕг дӕр.