Куысты бынæттæн сæ 75% бацахсдзысты роботтæ æмæ машинæтæ. Уыцы хъуыддаг 20-30 азæй раздæр не`рцæудзæн. Фæлæ нæ абон та цавæр дæсныйæдты кусджытæ хъæуынц? Нæ республикæйы адæмы куыстæй ифтонггæнæг комитеты бæрæггæнтæм гæсгæ, хæстæгдæр дыууæ азы мах тынг хъæудзысты медицинон кусджытæ, ахуыргæнджытæ, слесыртæ, æндадзджытæ æмæ хуыйджытæ.
Уæдæ нæм цымæ ацы дæсныйæдты кусджытæ фаг ис, æмæ цавæр куысты бынæттæм æнхъæлмæ кæсынц хъæуты цæрджытæ? Разы цавæр куыстыл сты, æмæ цавæр бынæттæ нæ цæуынц сæ зæрдæмæ, стæй сын баххуыс кæнæн цы хуызы ис? Ууыл дзурдзыстæм нæ программæ Комæй-коммæ»-йы.
Не студийы уазджытæ сты: Цæгат Ирыстоны адæмы куыстæй ифтонггæнæг комитеты сæргълæууæг Платы Альбинæ, куыстуат «Владгортранс»-ы сæйраг директор Абайты Таймураз, куыстуат «Дзæуджыхъуæуы разамынддæттæг компанийы» сæйраг директор Рæмонты Руслан æмæ куыстуат «Хуссайраг промышленнон компани» саразæг Уаниты Виктор.
