Ацы аз сæхгæнынмæ хъавыдысты «Зæххы хæйттæ бирæсывæллонджын æрыгон бинонтæн раттыны» федералон программæ. Уыцы уавæр сæвзæрди, бирæ регионты уæгъд зæххытæ кæй нал баззади, уый тыххæй. Фæлæ уæддæр субъектты куыст цæуы программæ адарддæр кæныныл.
Куыд æппæт бæстæйы, афтæ Ирыстоны дæр программæ кусы 2011-æм азæй нырмæ. Дзуапп ын дæттынц зæххы ахастдзинæдты æмæ исбоны министрад, стæй районты администрацитæ. Куыд ыл цæуы куыст? Программæйы фæрцы зæххы хæйттæ цал бинонтæ райстой æмæ цæмæй æййафынц къуылымпыдзинæдтæ?
Ууыл дзурæм нæ программæйы «Комæй-коммæ». Не студийы уазджытæ сты Цæгат Ирыстоны зæххы ахастдзинæдты æмæ исбоны министры хæдивæг Датиты Алан, Кировы районы сæргълæууæджы хæдивæг Елуаты Алымбег æмæ Дыгуры районы муниципалон зæхмæ цæстдарды хайады сæргълæууæг Тотойты Ацæмæз.