Ахæм ныртæккæ у донæ станцæ. Фæлладуадзæн бынат байгом кæнынмæ цæрджытæ æхсызгонæй æнхъæлмæ кæсынц. Рацарæзт райдыдтой 2022-æм азы. Ныридæгæн сæйраг куыстытæ кæронмæ æрхæццæ сты. Подрядон куыстуат “Интенсивник” цæттæ кæны сывæллæтты пляж, йæ дæргъ уыдзæн 100 метры. Змис дзы уыдзæн хурмæ чи нæ тæвд кæндзæн, ахæм.
Куыстыты бæрц чысыл нæ уыд. 70 азмæ иу хатт дæр рацарæзт никуы баййæфта. Проектыл хъуыд лæмбынæг бакусын, цæмæй æппæт домæнтæн дæр дзуапп дæтта. Былгæрæттæ фидаргæнæн куыстытæ, дондзæуæн æмæ канализацион системæты арæзтад, рухсгæнæнтæ. Се ‘ппæт дæр ивд æрцыдысты. Уымæй уæлдай ма сарæзтой дыууæ цады бынтæ, иу сæ уыдзæн æрмæст аттракционтæ æмæ кæсаг ахсынæн.
Кæрдæг, бæлæстæ, дидинджытæ — ныридæгæн цъæхфæлыстимæ фæзуæттæ дæр сты цæттæ. Баивтой станцæйы логистикæ дæр. Сног кодтой асфальт æмæ брусчаткæ. Спортивон фæзты сывæрдтой тренажертæ. Милдзыхты Вячеслав куыд фæнысан кодта, афтæмæй æппæт мадзæлттæй дæр уыдзæн пайда кæнæн лæвар. Доны станцæмæ бацæуæн дæр уыдзæн лæвар.
Фидæны станцæмæ æнхъæлмæ кæсынц егъау ивддзинæдтæ. Инвестицион программæмæ гæсгæ, йæ фарсмæ фæзындзæн æрвылазон аквапарк. Базилдзысты заууат уавæры чи ис, уыцы зындгонд амфитеатрмæ. Фæнд ма кæнынц фысымуæтты ног комплекс. Фæлæ, æппæт уыцы хъуыддæгтæ аразгæ сты цæрджытæн сæхицæй, фæнысан кодта Милдзыхты Вячеслав. Фарста æхсæнадмæ рахæстдзысты ног къуыри.
Найæн сезон райдайдзæн сæрды фыццаг бон, сабаты доны станцæ суазæг кæндзæн фыццаг уазджыты. Цы куыстытæ ма дзы баззад уыдон дарддæр æххæстгонд цæудзысты. Подрядон куыстуатимæ бадзырд адæргъвæтин кодтой 1-æм июлы онг. Фæлæ 15-æм июны онг æппæт фиппаинæгтæ дæр хъуамæ иуварсгонд æрцæуой.
