Йе `фтиæгтæ фæцæрынæн æппынкъаддæр бæрцæй ныллæгдæр кæмæн сты, уыцы бинонты уаргъ фенцондæр кæнынæн паддзахад аразы алыхуызон мадзæлттæ. Зæгъæм, республикæйы сфидар кодтой ныййарджытæн рæвдауæндæттæн фиддонты кæцыдæр хай фæстæмæ дæттыны уынаффæ. Бахастой йæм ивддзинæдтæ. Раздæр-иу ныййарджытæ иу сывæллонæн фиддонтæй фæстæмæ райстой дыууын, дыууæйæн – фæндзай, æртæ кæнæ фылдæр сывæллонæн та – æвдай проценты. Парламенты депутат Елена Князевайы ныхæстæм гæсгæ бинонтæ æххуысхъуагыл нымад куы уой, уæд ма сын сæ раздæры компенсацион фиддонтæм бафтаудзысты.
Компенсацитæ бынтондæр айсын æмæ сæ фæкæсæгхъуаг бинонтæн раттыныл – ныхас нæ цæуы. Ивддзинæдтæ баст сты республикæйы социалон рæзтимæ. Мæт кæнын дзы нæ хъæуы. Уый нæ, фæлæ компенсацитæ кæмæн æмбæлынц, уыдон райдайæнт хъæугæ гæххæттытæ æмбырд кæнын.
