Æрмæст къултæ фæхъæддых кæнын дзы нæ бахъуыд. Зæгъæн ис, æмæ ам алцыдæр уыд хъæдæй арæзт. 85 азмæ скъола заууат уавæрмæ æрцыд. Хъуна къултæ æмæ æмбыд пъолтæ, уæдæ агъуыстыты цартæ дæр сты заууат уавæры. Бындурон цалцæгмæ ам тынг æнхъæлмæ кастысты.
Цалцæг райдыдта ацы аз, мартъийы. Ныридæгæн дзы бакодтой бирæ куыстытæ. Баивтой бæстыхайы сæр, уæладзгуыты ‘хсæн хъайвантæ æмæ цæджындзтæ, цар, рудзгуытæ æмæ дуæрттæ. Ныртæккæ дзы кæнынц мидæггаг куыстытæ, архайынц хъармгæнæн ситемæйыл, ивынц электрон тыхы телтæ æмæ дондзæуæн хæтæлтæ. Спортивон зал та ныридæгæн у цалцæггонд. Уым куыстытæ сæххæст кодтой æндæр программæйы фæлгæты. Объекты æддаг фарс дæр райдыдтой ахорын, зæгъынц специалисттæ. Ахуыргæнæндоны зæронд бæстыхай у цæттæ 70%. Ног та – 20%.
Цалцæджы фæстæ скъолайы байгом кæндзысты АйТи-Куб национ проект “Ахуырад”-ы фæлгæты. Уыдзæн республикæйы дыккаг ахæм центр. Тæккæ нырыккондæр кусæнгæрзтæ, раст ма витуралон дунемæ абалц кæнынæн дæр сæрмагонд техникæ. Сывæллæттæн дзы равзарæн ис архайды здæхтытæ – робототехникæ, програмировани, администрировани. Скъоладзауты исдзысты 5 азæй. Æмæ кæд нырма цалцæг цæуы, уæддæр алы бон дæр ардæм æрбацæуынц сывæллæттæ хъазæн фæзы тезгъо кæнынмæ.
Скъола йæ дуæрттæ байгом кæндзæн 2-æм сентябры. Ног ахуыры аз сывæллæттæ ахуыр кæндзысты дыууæ фæлтæрмæ гæсгæ. Пъланмæ гæсгæ зæронд бæстыхайы æппæт куыстытæ дæр фæуыдзысты 20 августы. Ног бæстыхайы та цалцæг цæудзæн декабры онг.
