Æрæджы дæр ма ам хуымæтæг архайдæн уавæртæ нæ фаг кодта. Абон сабитæн – хицæн бынæттæ ахуыр кæнынæн, сфæлдыстадæн æмæ хи ирхæфсынæн. Сывæллæтты рæвдауæндон байгом 10 сентябры. Уымæй размæ æнусы æрдæджы куыста æндæр бæстыхайы, райдианы кусæндонæн нысангонд чи нæ уыд, ахæм ран. Зæронд ахъуысты хъомылгæнинæгтæн бынат нæ фаг кодта. Ныртæккæ та фадат ис æппæт проекттæ æмæ программæтæ сывæллæтты рæзтæн æххæст кæнынæн.
Сывæллæтты рæвдауæндоны ма фæзындысты, раздæр æппындæр чи нæ уыд, ахæм кабинеттæ дæр. Хицæн агъуыст сифтонг кодтой психологæн, ноджы иу ма – ирон æвзагæй ахуыртæн. Бынаты ма сарæзтой чысыл музей, сабиты истори æмæ традицитимæ зонгæ кæнынæн.
Рацарæзт æрмæст скъолайы агъоммæйы ахуырадмæ нæ хауы. Цалцæджы фæстæ йæ хуыз фæивта Дур-Дуры скъола дæр. Ам чи кусы æмæ ахуыр кæны, уыдонæн ивддзинæдтæ уæлдай æхсызгон ‘сты.
Скъолайы сног кодтой кабинеттæ, сæвæрдтой интерактивон фæйнæджытæ, фæзындысты дзы ног компьютертæ æмæ ноутбуктæ. Уыимæ ма дзы сифтонг кодтой агрокъласы тыгъдад. Скъоладзаутæн дзы сæ бон уыдзæн æрмæст теори ахуыр кæнын нæ, фæлæ ма нырыккон кусæнгæрзтимæ архайын дæр – инкубаторæй цыхтахсæны онг.
Ныр скъолайы агъоммæйы сывæллæттæн æмæ скъоладзаутæн фæзынд ног фадæттæ ахуыр æмæ райрæзтæн. Ногдзинæдтæм æнхъæлмæ кастысты дæсгай азты. Абон фæсивæдæн ис æппæт хъæугæ, æнцонвадат уавæртæ.
