Æртыккаг æмæ йæ фæстæ гуырд сывæллæттæй 3 азы онг кæуыл цæуы, уыдонæн ацы аз фиддон исын райдыдтой 8 мин бинонтæ. 3-йæ 7 азы онг фиддон та — 19 мин бинонтæ. Уый тыххæй фехъусын кодта фæллой æмæ социалон райрæзты министр Айдарты Алинæ.
Санкциты рæстæг экономикон уавæры фæдыл оперативон штабы æмбырд амыдта хицауады сæрдар Дзанайты Барис. Ахадгæ у социалон контракт дæр. Йæ фæрцы æххуысцух бинонты уавæртæ фæхуыздæр сты, бирæтæ та куысты ныллæууыдысты. Рагагъоммæйы бæрæггæнæнтæм гæсгæ æххуысæй афæдзы дæргъы спайда кæндзысты мин æмæ æрдæгæй фылдæр цæрæджы. Министры ныхæстæм гæсгæ, æппæт районты байгом кæндзысты армукъатæ. Уыдзæн дзы бынæттон кондады хæлц. Ныридæгæн ацыдысты Кировы æмæ Рахизфарсы районты. Чысыл æмæ рæстæмбис амалхъомадæн æмæ хибарæй чи кусы, уыдонæн æххуысы тыххæй радзырдта экономикон райрæзты министр Кучиты Зауыр. Амалиуæг кæнын чи сфæнд кæны, уыдонæн сæ бон у 300 мин сомы онг грант райсын. Фылдæр æргом здæхт цæуы адæмон сфæлдыстады æрмдæсныты архайдмæ, информацион технологитæм æмæ, хæххон районты чи кусы, уыдонмæ.
