Боныхъæд сæ хъæрмттæй нæу. Термометр минусы ‘рдæм атындзыдта æмæ 7 градусы уазал æвдисы. Фæлæ цалынмæ иутæ сæхи хъызтæй æмбæхсынц, уæдмæ æвзонг спортсментæ ерыс кæнынц командæйы сæйраг скондмæ бахауыныл.
Æрæджы тренертæ хъахъхъæнджытæ æмæ размæбырсджыты равзæрстой 2010 азы чи райгуырд, уыцы фæсивæды ‘хсæн. Ныр дуаргæстæм у сæ каст. Цæттæгонд цæуы “Алани”-йы сæйраг къорд.
Клуб “Алани” хъазы фæсивæдон футболон лигæйы ныр 3 сезоны дæргъы. Ивгъуыд аз сын æрхаста 3-аг бынат. Ныр бæрзонддæр къæпхæнмæ тырнынц.
Дуаргæсы бынат — ахсджиаг у. Размæбырсæг, зæгъæм, цалдæр æнæнтыст фæлвæрды фæстæ дæр куы бакъуыра пурти ныхмæлæууæджы кулдуары, уæд дæр хъазты хъайтар суыдзæн. Голкиперы уавæр ахæм нæу. Йæ иунæг рæдыд дæр хатдзæгтæ ивы. Ногъаты Тимур хуыздæрты хыгъды ис. Лæппуйæн йæ фыд дæр футболæй хъазыд. Бирæ азты дæргъы тренировкæтæн — аккаг тыллæг.
Хур, мит, къæвда — боныхъæд “Алани”-йы фæсивæдæй æппындæр никæй хъыгдары. Кæддæриддæр — размæ. Афтæмæй та сæ чемпионтæ суæвынæн дæр бирæ рæстæг нæ бахъæудзæн.
