“Лето с Пушкиным”, зæгъгæ, проекты бацархайдтой республикæйы фæсивæд

“Лето с Пушкиным”, зæгъгæ, культурон проекты бацархайдтой нæ республикæйы фæсивæд. Мадзал нысангонд у Александр Пушкин æмæ нæ Дзæуджыхъæуæн. Номдзыд фыссæг Ирыстоны уыд 1829-æм азы Петербургæй туркаг Арзруммæ куы цыд, уæд. Сфæлдыстадон проект бацæттæ кодта нывкæнынадты аивæдты паддзахадон музейы Цæгат Кавказы филиал. Фараст боны дæргъы фæсивæд зонгæ кодтой Пушкины биографиимæ. Алыхуызон бынæттыл экскурситæ æмæ лекцитæ, сфæлдыстадон куыст. Сывæллæттæ фыстой æмдзæвгæтæ, хъуыды кодтой алыхуызон цаутæ, фыссæджы балцмæ гæсгæ ныв кодтой иллюстрацитæ. Куыд хатдзæг афтæ архайдæй рауад журнал нывтæ æмæ текстимæ. Балцвæд дзуры Пушкин 19-æм æнусы Дзæуджыхъæуимæ куыд зонгæ кодта, ууыл. Уырыссаг литературон æвзаджы бындурæвæрæджы тыххæй систой цыбыр киноныв дæр. Проект арæзт æрцыд æртыккæгæм хатт. Снысан æй кодтой зындгонд поэты райгуырды 250 азы кадæн. Сæйраг нысан — рæзгæ фылтæры æмхиц кæнын литературæмæ.