Литературон-аивадон журнал “Мах дуг” уæлдай æргом здахы не ‘взаг бахъахъхъæнынмæ, нæ культурæ парахат кæнынмæ, нæ национ хæзнатæм. Аивадуарзджыты ног нæмттимæ базонгæ кæнын æмæ аив дзырдмæ йæ зæрдæйы уæлдай уарзондзинад кæмæ ис, уыдоны разæнгард кæнын у журналы премийы сæйраг нысан. Ацы аз æй расидтысты æртыккаг хатт.
Сфæлдыстад хæстæг кæмæн у, уыдонæн фадат ис кæсджыты сæ уацмыстимæ базонгæ кæнын. Ныридæгæн æрбарвыстой 100 куыстæй фылдæр. Архайджыты ‘хсæн Цæгат æмæ Хуссар Ирыстон, уыимæ ма алы бæстæты цæрæг ирон адæм. Сæ курдиат равдыстой фондз номинацийы – поэзи, прозæ, публицистикæ, аивадон тæлмац æмæ драматургийы. Жюрийы уæнгтæ куыд фæнысан кодтой, афтæмæй уæлахиздзау сбæрæг кæнын æнцон нæу.
Преми сфидар кодтой 2021- æм азы. Мамиаты Таймураз фыццæгтæй иу бафæлвæрдта йæ тыхтæ. Номинаци публицистикæйы сси дунеон премийы лауреат. Йæ ныхæстæм гæсгæ йын уæлдай æхсызгон у фæсивæд дзы кæй архайы, уый.
Конкурсы сæйраг домæн – уацмыстæ хъуамæ раздæр мыхуыргонд ма æрцæуой. Афтæмæй преми æххуыс у литературон фæндагыл фыццаг къахдзæфтæ чи кæны, уыцы автортæн.
Уæлахиздзаутæ сбæрæг уыдзысты афæдзы кæрон. Ирон аивадон литературæ фæхъæздыгдæр уыдзæн ног уацмыстæй. Уый та стыр æххуыс у нæ культурæйы райрæзтæн.
