Сентябрь ралæууыд, æмæ кæд уазæлтты афонмæ нырма дард у, уæддæр æнæниздзинадмæ рагацау фæкæсын хъæуы. Мæйы райдианæй республикӕйы поликлиникӕтӕ кæй фæнды, уыдонæн сæ дуæрттæ байгом кодтой, вакцинаци кæныны фæдыл, ахӕмтӕ та регионы чысыл нӕй — ацы сезоны прививкӕ скӕнынмӕ хъавынц 400 мин адæймагæй фылдæр.
Фыццæгæм поликлиникӕйы вакцинаци йӕ тӕмӕны бацыд — алы мӕй дӕр 100 адӕймагӕй фылдӕр ӕмӕ уый ӕрмӕст гриппы ныхмæ. Процедурӕйы размӕ пациентæн амонынц дохтыры æркаст ацæуын, паспорт æмæ снилс райсын, прививкӕйы фӕстӕ та ма суазал уæвын ӕмӕ хъæбæр нозт ма нуазын. Препараттӕ бæстæйы уагъд, иу укол фаг кӕны ӕнӕхъӕн сезонӕн.
Фӕлӕ ӕнӕууӕнк пациенттæ дæр гыццыл не сты — ӕрфарстмӕ гӕсгӕ уӕрӕсейӕгтӕн сӕ 62 процентӕй фылдӕр дызӕрдыг кӕнынц гриппы ныхмæ прививкӕты пайдайыл. Дохтыртӕ фӕдзӕхсынц, иунӕг вакцинӕ дӕр вирусӕй ӕххӕст ӕдасдзинад нӕ дӕтты, препарат ӕрмӕст нысангонд у иммунитет фæфидар кӕнын ӕмӕ низы уӕззау цыд бауромын.
Ахæм æнкъарæнтимæ та прививкӕтӕ кæнынц ӕппӕты чысыл пациенттæн, статистикӕмӕ гӕсгӕ, сабитæ тынгдӕр тыхсынц æхснырсæгæй. Аленӕ сывӕллонæн алы аз дӕр вакцинаци кӕны — дзуры арӕх фæрынчын вæййы, зæгъгæ, æмæ бахъæуы дзæбæхгæнæн мадзæлттæ æххæст кæнын. Ацы хатт инъекци у плъанмæ гæсгæ, фӕлӕ сӕ фидӕны фӕнды гриппы ныхмæ дæр прививкӕ скӕнын.
Сывӕллӕтты фыццæгæм поликлиникæйы вакцинаци нырма ис райдиан къæпхæныл — ног хостӕ нырма ӕрӕджы райстой. “Ультрикс Квадри” ӕмӕ “Гриппол” – фыдыбӕстӕйаг раззагдӕр препараттӕ, дохтыртӕн ныридӕгӕн сӕ хъомысæн аргъ скодтой – ӕууӕнкджын, сӕйрагдӕр та хӕрзхъӕд. Сӕ иу хъахъхъӕны 4 штаммӕй, иннӕ та 3 штаммӕй.
Фӕлӕ вакцинӕйӕ уӕлдай стыр ахадындзинад ис профилактикæйы мадзæлттæн, зæгъынц Уæрæсейы фæлхасгæнджытæм цæстдарды управленийы. Къухтӕ ӕхсын, антисептиктӕй пайда кӕнын, гаджеттӕ дезинфекци кӕнын.
Хи бахъахъхъӕнын та куыд зыны, уымæй æнцондæр у. Фаг у æрмæст хъæугæ документтæ бацæттæ кæнын æмæ хæстæгдæр поликлиникæмæ хи ныффыссын. Процедурӕ æххæстæй иу бонӕй фылдӕр нӕ ахсы.
