18 октябры æхсæвы Дзӕуджыхъӕуы ресторантæй иуы быцӕу рауад. Аппаратон æмбырд Сергей Меняйло райдыдта ацы темӕйӕ. Сæргълæууæг бардзырд радта Мидхъуыддӕгты министрад ӕмӕ Национ политикӕйы министрадӕн, цӕмӕй цау раиртасой. Куыд фӕбӕрӕг кодта, афтӕмӕй, фыццаг хатт нæу. Уымӕ гӕсгӕ регионы разамонӕг фӕндон бахаста — ресторантӕ ӕмӕ кафетӕ ӕхсӕвыгӕтты сӕ куысты рӕстӕг фӕкъаддӕр кӕнæд.
Æмбырды æрдзырдтой артаджы уавӕрыл дӕр. Ныртӕккӕ æвæрæнты ис 1955 тоннӕйы бензин ӕмӕ 1081 тоннӕйы дизель. Тагъд ма ӕрбаласдзысты 3800 тоннӕйы бензин ӕмӕ 3151 тоннӕйы дизель. Бархионтæ нырма станцæты радгӕс лæууынц. Цæрæн-коммуналон хæдзарад, артаг ӕмӕ энергетикӕйы министры хӕстӕ рӕстӕгмӕ ӕххӕстгӕнӕг Хъараты Тимур фехъусын кодта ӕргътӕ. 92-ӕм бензины литр у 65 сомы аргъ, 95-ӕм та — 71 сомы. Республикӕйы райдыдта хъармгӕнӕн сезон. Ӕппӕт районтӕ дӕр райстой зымӕгмӕ цӕттӕдзинады гӕххӕттытӕ. Регионы сӕргълӕууӕг ма бабар кодта Роспотребнадзорæн, цӕмӕй хъус дарой низты уавӕрмӕ. Ивгъуыд къуырийы республикӕйы COVID-19 никæмæ рабæрæг. Фæлæ бирæтæ гриппӕй рынчын сты.
Цӕгат Ирыстоны дарддӕр æмбырдгонд цæуы ног хицауад. Республикӕйы сӕргълӕууӕг ныридӕгӕн снысан кодта дыууӕ вице-премьеры. Иуӕй-иу министрадты ӕмӕ кусæндæтты дӕр раивтой разамонджытӕ. Закъонмӕ гӕсгӕ регионы разамонæгæн ӕвзӕрстыты фӕстӕ ис дыууӕ мӕйы, цӕмӕй ӕппӕт кадрон уынаффӕтӕ рахӕсса.
Хицауады уæнгтæ хъуамӕ цӕрджыты фарстаты тыххæй зоной канд официалон фыстытӕй нӕ, фӕлӕ социалон хызтӕй дӕр. Уый феххуыс уыдзӕн цыфӕнды цаутӕн дӕр тагъд дзуапп дӕттынӕн. Сергей Меняйло бардзырд радта Регионæн разамынды центрӕн, цӕмӕй алы бон дӕр ӕмбырд кӕной адӕмы хъӕстытӕ социалон хызæгтæ ӕмӕ интернет-ӕхсӕнадтӕй æмæ сæ ӕрвитой министрадты разамонджытӕ ӕмӕ районты сӕргълӕуджытӕм.
Сергей Меняйло ма бабар кодта регионы туристон бынӕттӕн иумӕйаг стиль, брендинг, саразын. Экономикон рӕзты министрад ацы фарстайыл кусын райдайдзӕн тагъд рӕстӕджы.
Ӕрвылкъуырион аппаратон ӕмбырды ахсджиаг фарстатæ уыд, уыдон æххæст кæнынмæ уыдзæн бæстон цæстдард.
