Æппæт патологон ивддзинæдты тыххæй дæр аразгæ интеллект фехъусын кæны цавæрдæр хуыз амонгæйæ. Зæгъæм, æрвгъуызæй æвдыст цæуынц рæуджытæ хъыгдæрд цы бынаты сты, уый. Адæймагæн йæ бон куыд æмбæлы, афтæ улæфын нæу. Ирд-сырхгонд цыппаркъуымон, дзурæг у ууыл, æмæ хъыгдæрд бынат у 6 миллиметрæй фылдæр. Æмæ афтæ дарддæр. Ахæм хуызы нейронон хызæгтæ иртасынц компьютерон томографи. Специалистты ныхæстæм гæсгæ, программæ дохтыр-рентгенологæн æххуыс кæны йе ‘ргом бæлвырд бынатмæ аздахыны. Æппæт ивддзинæдтæ, локализаци, йæ гуырахст æмæ æндæр лыстæгдзинæдтæ аразгæ интеллект бæрæг кæны рагагъоммæйы суагъæйы. Пациентæмæ рабæрæг кодтой пневмония. Уæрæсейаг бакуысты руаджы йын æвæстиатæй снысан кæндзысты дзæбæхгæнæн мадзæлттæ.
Фæлæ бæрнондзинад, кæй зæгъын æй хъæуы специалисттыл. Технологи диагноз нæ æвæры. Зондджын системæ фæнысан кæны рагагъоммæ хуызы патологитæ. Дохтыр рентгенолог Хъæбæлоты Аленæ программæйы иртæстытæ лæмбынæг сбæрæг кæны, æрмæст уый фæстæ скæны хатдзæг. Программæ кусы афтоматикон æгъдауæй. Лаборанты станцæйæ ист къамтæ æрвыст цæуынц медицинон иртæстыты центрон архивмæ. Нейрохыз 5 мины фæстæ бакусы бæрæггæнæнтыл. Аразгæ интеллектæй Цæгат Ирыстоны æнæниздзинад хъахъхъæныны къабазы пайда кæнын райдыдтой афæдзы райдиан.
Аразгæ интеллегтимæ кусын дохтырты онлайн хуызы ахуыр кодтой Мæскуыйæ специалисттæ. Ныридæгæн дзы пайда кæнынц республикæйы æппæт медицинон кусæндæтты. Сервис иртасы риуыгуыдыры оргæнтæ. Дарддæр ацы куыст фæнд кæнынц парахат кæнын. Рентгенологты ныхæстæм гæсгæ, ахæм нымæцон æххуыс у хъæугæ. Уæлдай дæр та сæр иртасынмæ. Дохтыртæ ма бæллынц хъæлæсы хызы чи æххуыс кæны, ахæм программæмæ.
