Æгъдау хъахъхъæнджытæ, рæстæджы сидт æмæ фæлтæрты астæу хид — Цæгат Ирыстоны паддзахадон университеты “Точка кипения”-йы байгом равдыст “Лица Кавказа”. Нырыккон уавæрты Цæгат Кавказы адæмыхæттыты æгъдæуттæ æмæ культурæ бахъахъхъæнын — ахæм ахсджиаг хæс йæ размæ сæвæрдта æхсæнад “Знание”-йы лектор Александр Карманов. 2024 азы йæ къухы бафтыд рамбулын Культурон хъæппæристы президентон фонды грант æмæ йæ къордимæ райдыдта кусын ныртæккæ цы документалон кино æмæ хуызистытæ рахастой адæмы рæгъмæ, уыдоныл.
Сæ нысанмæ фæндагыл фæсивæд æрзылдысты æгас Цæгат Кавказыл, Махачкалайæ Пятигорскы онг. Ссардтой фыдæлты æгъдæуттæ чи хъахъхъæны, ахæм адæмыхæттытæ æмæ хицæн бинонты дæр. Зæгъæм, цы хуызы æмæ цавæр ивддзинæдтимæ æрхæццæ сты нæ дугмæ ивгъуыд æнусты уæлæдарæсы æууæлтæ? Абон дзаумайыл рагон орнамент чи сныв кæны, уый цы мидис хæссы дзыллæтæм? Ацы фæрстытæн, равдыст “Лица Кавказа” фенгæйæ, дзуæппытæ базондзысты Цæгат Кавказы æппæт регионты дæр.
