Лабораторон мыстыты ӕмӕ уырыты ам хонынц пациенттæ. Ӕмӕ сӕм уӕлдай цæстæй кӕсынц. Уымӕн ӕмӕ ЦИПУ-йы ахуыргӕндты лыстæг цæрæгойтæ ӕмӕ бындурон иртасӕн куыстыты руаджы къухы бафтыд ахсджиаг хъуыддаг раргом кӕнын. Дадзинтыл æрмæст кар ӕмӕ стресс нӕ фæзынынц. Сӕйрагдӕр знӕгтӕй иу у ныллӕг ӕнгомады липопротеидтӕ, хуымӕтӕгдӕр зӕгъгӕйӕ та “ӕвзӕр холестерин”. Уый хъыгдары тугдадзинты мидӕггаг цъар ӕмӕ скусын кӕны процесстæ, уыдонæн сæ бон у атеросклерозмӕ расайын.
Сӕйраг мысан — митохондритӕ. Зæгъгæ, чырӕг чысыл горӕт куы уа, уӕд дзы уыдон дзуапп дӕттынц энергийӕ ифтонг кӕнынæн. Дзӕбӕх куы нал фӕкусынц, уӕд буарæн фæзындæр вæййы. Æмæ ам хъазтмӕ рахизынц зайӕгойтӕ. Розмарин, Артишок, Мирт. Ахуыргӕндтӕ сын сӕ экстракттӕ бафтыдтой дадзинты хъыгдард чырӕгтӕм. Ӕмӕ райстой, дисы чи ‘фтауы, ахӕм эффект: митохондритӕ фӕстӕмӕ сӕ нывыл куыстмӕ здӕхын райдыдтой. Хуымæтæгдæр дзургæйæ — цы чырæг бахъыгдæрдтой, уымӕн фадат ис схорз уæвынæн.
ЦИПУ-йы лабораторийы хистӕр наукон кусӕг Дзампаты Жаннӕ ӕмӕ магистрант Родион Савельевы куыст банымадтой æппæтадæмон æмвæзадыл – хатдзæгтæ мыхуыргонд æрцыдысты сæрмагонд журналы, арæхдæр дзы вæййы зӕрдӕйы дадзинты иртасӕн куыстытӕ. Родионы бакуыстыты ног къӕпхӕнӕй йе ‘ргом махмæ раздахын къухы нæ бафтыд суанг съемкӕты рӕстӕг дӕр. Зондамонджытӕ дзурынц — фæсивæд сӕ хъуыддагӕй разæнгард кæнынц ӕмӕ бӕллынц медицинӕ размӕ ракӕнынмӕ.
Ног хосыл дзурын нырма раджы у. Бирӕ фæрстытæн дзуаппытӕ райсын хъӕуы. Фӕлӕ университеты ахӕм ахсджиаг иртасӕн куыстытӕ кӕй кӕнынц, уый ныридӕгӕн стыр ӕнтыст у. Уыимæ ма, проектыл разæнгардæй куыстой æрмæст ахуыргӕндтӕ ӕмӕ студенттӕ нӕ, фӕлӕ ма хӕрз ӕвзонг энтузиасттӕ дӕр. Университеты рӕзтмæ стыр ӕргом здахынц.
Командӕмæ разӕй æнхъæлмæ кæсынц ног иртасӕн куыстытӕ. Чи зоны, дадзинтӕ хъахъхъӕнынмӕ иннӕ къахдзӕф афтечы нӕ, фӕлӕ, цыма хуымӕтӕг зайӕгой у, афтӕ райдайдзӕн. ЦИПУ-йы ахуыргӕндты ныр базонын хъӕуы, уыцы эффект цас апарахат уыдзæн, уый.
